- ट्रेण्डिङ :
हिमाली जिल्लामध्ये सुन्दर बजारमा पर्दछ चरिकोट । भीमेश्वर नगरपालिका अन्तर्गत पर्ने दोलखाको सदरमुकाम हो चरिकोट । चरिकोट सदरमुकाम १ हजार ९७० मिटर उचाइमा पर्दछ ।
काठमाडौंबाट १३३ किलोमिटर टाढा पर्दछ चरिकोट । जुनसुकै मौसम र समयमा पनि चिटिक्क देखिन्छ चरिकोट । यही चरिकोटबाट १८ किलोमिटर तल तामाकोशी बजार झर्दा तराईको मौसम महसुस हुन्छ । किनकि तामाकोशी बजार ८०० मिटर उचाइमा पर्दछ । यही चरिकोटबाट १७ किलोमिटर उकालो लाग्दा कालिञ्चोक मन्दिर पुगिन्छ ।
कालिञ्चोक भगवती मन्दिरको उचाइ ३ हजार ८४२ मिटर छ । जसले गर्दा गर्मी होस् या चिसो मौसम, यहाँको वातावरण छिनछिनमा बदलिइरहन्छ । अझ वर्षायाममा बादलको लुकामारीले चरिकोटको सुन्दरतामा झन् सुन्दरता थपिरहन्छ । सदरमुकाम चरिकोट दोलखा जिल्लाको ट्रान्जिट प्वाइन्ट पनि हो ।
चरिकोटमा सुविधासम्पन्न होटलहरू भएकाले दोलखा भित्रिएका पर्यटकले प्रायः एक रात यहीं बसेर मात्र अन्यत्र गन्तव्य तय गरेका हुन्छन् । दोलखामा रहेका गौरीशंकर हिमाल, माथिल्लो तामाकोशी जलविद्युत् आयोजना, गौरीशंकर संरक्षण क्षेत्र आयोजना, च्छोरोल्पा हिमताल, लाप्ची गुम्बा र विगु गुम्बामा जानको लागि आन्तरिक तथा बाहृय पर्यटकहरू यही बाटो हुँदै जाने हो ।
यहींबाट दोलखाको ८ वटा स्थानीय तहहरूमा पुग्न सकिन्छ । चरिकोटबाट भीमेश्वर मन्दिर, कालिञ्चोक मन्दिर, राङराङथली थामी संग्रहालय र महांकाल मन्दिरमा मोटरबाटोहुँदै सहज तरिकाले पुग्न सकिन्छ । चरिकोट सातदोबाटोबाट जिरी नगरपालिका ५५ किलोकिलोमिटर टाढा पर्दछ ।
