- ट्रेण्डिङ :
काठमाडौँ - साउदी अरबको पूर्वी प्रान्तस्थित शैबाह तेल क्षेत्रमा भएको ड्रोन आक्रमणमा परी एक नेपालीसहित दुई विदेशी श्रमिकको मृत्यु भएको छ । मृतकमा एक फिलिपिनी नागरिक पनि रहेको साउदी अरबको ऊर्जा मन्त्रालयले जनाएको छ ।
साउदी अराम्कोको परियोजनालाई लक्षित गरी बुधबार बिहान गरिएको ड्रोन आक्रमणका क्रममा यो घटना भएको हो । मन्त्रालयका अनुसार तेल क्षेत्रको प्रशोधन केन्द्रतर्फ आएको ड्रोनलाई साउदी हवाई प्रतिरक्षा प्रणालीले बीचमै रोक्न सफल भएको थियो ।
तर, ड्रोनलाई रोक्ने क्रममा त्यस क्षेत्रमा काम गरिरहेको ठेकेदार कम्पनीको एउटा सवारीसाधनमा आगलागी हुन गएको थियो । सोही घटनामा एक नेपाली र एक फिलिपिनी नागरिकको मृत्यु भएको र एक-एक पाकिस्तानी तथा भारतीय नागरिक घाइते भएको मन्त्रालयले विज्ञप्ती जारी गर्दै जनाएको छ ।
मन्त्रालयले आगलागी तेल प्रशोधन केन्द्रको परिधिबाहिर भएको र त्यसले तेल क्षेत्रको सञ्चालन तथा उत्पादनमा कुनै असर नपारेको स्पष्ट पारेको छ । घटनालगत्तै सम्बन्धित निकायहरूले आवश्यक सुरक्षा कदम चालेको पनि मन्त्रालयले जनाएको छ ।
यसैबीच, मन्त्रालयले मृतकहरूका परिवारप्रति गहिरो समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेको छ ।
घटनामा मृत्यु भएका नेपाली नागरिकको नाम र ठेगाना भने अझै सार्वजनिक गरिएको छैन ।
