- ट्रेण्डिङ :
कुवेतस्थित नेपाली राजदूतावासको आयोजनामा एक अनौपचारिक कार्यक्रम नेपाल पत्रकार महासंघ, एनआरएनए कुवेत , राजनीतिक दलका भातृ संगठन लगायत अगुवाहरु बीच सम्पन्न भएको छ । दूतावासको सभाहलमा १६ अगष्ट २०२४ मा उक्त कार्यक्रम सम्पन्न भएको हो ।
उक्त कार्यक्रममा बोल्दै राजदूत घनश्याम लम्सालले ७५९ जना घरेलु कामदारको उद्दार गरिएको जनाएका छन । वैदेशिक रोजगारीको सिलसिलामा कुवेत आएर विभिन्न कारणले पीडित भइ दूतावासको शरणमा आएका ३६९ जना घरेलु कामदारको सम्पूर्ण प्रकृया पूरा गरेर नेपाल पठाएको हो । त्यसैगरी दूतावास बाहिर बसेका अन्य ३९० जना घरेलु कामदारलाई दूतावासको समन्वय र सहजीकरणमा कानूनी प्रक्रिया पूरा गरी स्वदेश पठाउने व्यवस्था गरिएको राजदूत लम्सालले जानकारी दिएका छन । यो संख्या महामहिम राजदूत घनश्याम लम्सालले कार्यभार सम्हालेको दश महिनाको तथ्यांक हो ।
त्यस्तै ८७ हजार मागपत्र प्रमाणित गरिएको, ३१ हजार विभिन्न कागजात (भिसा प्रमाणीकरण बाहेक) प्रमाणित गरिएको, १३ हजार ४ सय ७८ राहदानी नविकरण गरि जारी गरिएको, ३ हजार ७ सय ९८ ट्राभल डकुमेन्ट (आममाफीमा जारी गरिएका ३ हजार २ सय सहित) जारी गरिएको, विभिन्न केशका ६७ जनाको क्षतिपुर्ति रकम १ लाख ८५ हजार कुवेती दिनार नेपाल पठाइएको राजदूतले बताए ।
अहिले पनि ५१ जना नेपाली विभिन्न केशमा अदालतको निणर्य बमोजिम कुवेतका जेलमा सजायँ भोगिरहेका छन् । जेलमा रहेकाहरूमा ४१ जना लागुपदार्थ ओसारपसारमा, ४ जना मादक पदार्थको किनवेचमा, २ जना हत्या अपराधमा सजायँ पाएकाहरू लगायत छन् ।
यस अवधिमा कुवेत र इराकमा गरि ६३ जना नेपालीको ज्यान गएको छ जसमा कुवेतमा मात्रै ५८ जनाको मृत्यु भएको छ भने सबै मृतकहरूको पार्थिव शरीर नेपाल पठाइसकिएको, १६ जनालाइ अस्पतालबाट उद्दार गरि नेपाल पठाइएको र ४ जना अझै पनि अस्पतालका सैय्यामा रहेको जानकारी दिइएको छ ।
