- ट्रेण्डिङ :
केही व्यक्तिहरू यस्ता पनि हुन्छन् जसलाई आँखा खुल्ने बित्तिकै तातो कफी नखाई हुन्न । कोही कोही त दिनभरि पनि बिच बिचमा कफी खाइरहन्छन् । तपाईंको बानी पनि यस्तै छ ? यदि छ भने यो लेख तपाईंको लागि हो ।
कफी एउटा पेय पदार्थ मात्रै होइन । धेरै मानिसहरूको लागि त यो ऊर्जाको स्रोत हो । दिनभरको थकानबाट छुटकारा पाउने तरिका हो ।
तर के तपाईंले कहिल्यै सोच्नुभएको छ तपाईँलाई मनपर्ने यो पेयले तपाईंको रगतमा चिनीको मात्रामा कस्तो प्रभाव पार्छ ? आजको यस लेखमा हामी कफीले रगतमा चिनीको मात्रालाई गर्ने असरबारे कुराकानी गर्नेछौँ ।
कफीले रगतमा चिनी बढाउँछ ?
कफीमा रहेको क्याफिनले तपाईंको रगतमा चिनीको मात्रा अस्थायी रूपमा बढाउन सक्छ भनेर केही अध्ययनमा पाइएको छ । यस्तो यस कारण पनि हुन्छ कि क्याफिनले एड्रेनालाईनजस्ता तनाव हर्मोनहरू बढाउँछ ।
यसले चिनी प्रशोधन गर्ने कोषहरूको क्षमतालाई अस्थायी रूपमा कम गर्न सक्छ । यसले इन्सुलिन संवेदनशीलतालाई पनि असर गर्न सक्छ, जसको अर्थ तपाईंको कोषहरूले इन्सुलिन हर्मोनलाई राम्रोसँग प्रतिक्रिया दिन सक्दैनन् ।
यो विरोधाभास अलि भ्रामक लाग्न सक्छ, तर यसको पछाडि धेरै कारणहरू छन्:
कफीमा पाइने अन्य इन्जाइमहरूः
कफीमा क्याफिन मात्र हुन्न । यसमा एन्टिअक्सिडेन्ट र म्याग्नेसियम जस्ता धेरै अन्य जैविक सक्रिय यौगिकहरू पनि हुन्छन् । यी तत्त्वहरूले शरीरमा सुन्निएको कम गर्न र इन्सुलिन संवेदनशीलता सुधार गर्न मद्दत गर्न सक्छन्, जसले लामो समयसम्म रगतमा चिनीको मात्रा सुधार गर्दछ ।
चिनी हालेको कफी कि नहालेकोः
यो सबै कुरा तपाईँले आफ्नो कफीमा के थप्नुहुन्छ भन्नेमा निर्भर गर्दछ । यदि तपाईँले चिनी, क्रिम वा स्वादयुक्त सिरप जस्ता चीजहरू थप्नुभयो भने, यसले निश्चित रूपमा रगतमा चिनी बढाउन सक्छ । तर चिनी र दूध बिनाको कालो कफीमा क्यालोरी र कार्बोहाइड्रेट धेरै कम हुन्छ ।
साथै, प्रत्येक व्यक्तिको शरीरले क्याफिनप्रति फरक प्रतिक्रिया दिन्छ । क्याफिनले केही मानिसको रगतमा चिनीमा थोरै वृद्धि गराउन सक्छ, जबकि यसले केही मान्छेमा खासै असर गर्दैन । मधुमेह भएका व्यक्तिहरूको लागि, यो प्रभाव अलि बढी हुन सक्छ । साथै, कफी पिउने समय र मात्रामा ध्यान दिनु जरुरी छ ।
मधुमेह रोगीहरूको लागि सल्लाह
तपाईँलाई मधुमेह छ वा तपाईँ आफ्नो रगतमा चिनी नियन्त्रण गर्न खोज्दै हुनुहुन्छ भने कफी सेवन गर्दा केही कुरामा ध्यानमा राख्नु पर्छ । यदि तपाईँ कफी पिउन चाहनुहुन्छ भने, चिनी र दूध बिनाको कालो कफी उत्तम विकल्प हो । सीमित मात्रामा कफी पिउनुहोस् । धेरै क्याफिनले निद्रालाई असर गर्न सक्छ, जसले इन्सुलिन संवेदनशीलतालाई पनि असर गर्न सक्छ ।
