- ट्रेण्डिङ :
कुवेत - गैर आवासीय नेपाली संघ, राष्ट्रिय समन्वय परिषद् (एनआरएनए) बद्री पक्षले आउदो शुक्रवार नेपाली श्रमिकका लागि निशुल्क स्वास्थ्य शिविर आयोजना गर्ने भएको छ ।
संघले आफ्नो पदस्थापनको पहिलो त्रैमासिकमै प्रचारमुखी गतिविधिभन्दा प्रभावकारी र श्रमिकमैत्री कार्यक्रमहरू सञ्चालनमा जोड दिदै भिभा क्लिनिक (VIVA Clinic) कुवेतको सहकार्यमा निःशुल्क स्वास्थ्य शिविर आयोजना गर्न लागिएको जनाएको छ ।
मङ्गाफस्थित भिभा क्लिनिकमा अक्टोबर १०, २०२५ (शुक्रबार) का दिन बिहान ७ बजेदेखि राति ९ बजेसम्म सञ्चालन हुने छ । शिविरमा सहभागी हुने सबै नेपाली नागरिकलाई निःशुल्क स्वास्थ्य परामर्श र आवश्यक औषधि उपलब्ध गराइनेछ। साथै, आधारभूत स्वास्थ्य परीक्षण, दाँत परीक्षण र आँखाको परीक्षणलगायत सेवा पनि प्रदान गरिने जनाइएको छ । एनआरएनएले कुवेतमा रहेका सम्पूर्ण नेपाली नागरिक, विभिन्न संघसंस्थाका प्रतिनिधि तथा अध्यक्षहरूलाई निर्धारित समयमा उपस्थित भई स्वास्थ्य परीक्षणमा सहभागी हुन आग्रह गरेको छ।
समूहले यस अभियानमार्फत कुवेतमा कार्यरत नेपाली समुदायबीच स्वास्थ्य सचेतना बढाउने र दीर्घकालीन स्वास्थ्य सुरक्षामा सहयोग पुर्याउने उद्देश्य लिएको जनाएको छ। कार्यकालको सुरुवाती चरणमै वास्तविक प्रवासी नेपालीहरूको आवश्यकता सम्बोधन गर्ने उद्देश्यका साथ व्यावहारिक कामलाई प्राथमिकता दिएको समूहले जनाएको छ।
भिभा क्लिनिक कुवेतकै एक लोकप्रिय र विश्वासिलो स्वास्थ्य संस्था हो, जसले लामो समयदेखि गुणस्तरीय स्वास्थ्य सेवा प्रदान गर्दै आएको छ।
