- ट्रेण्डिङ :
कुवेतको जनशक्ति व्यवस्थापन प्राधिकरणले अत्यधिक गर्मी र प्रतिकूल मौसमबाट मजदुरहरूको सुरक्षाका लागि जुन १ देखि अगस्ट ३१ सम्म दिउँसोको समयमा खुला क्षेत्रमा काम गर्न प्रतिबन्ध लगाउने निर्णय गरेको छ ।
कुवेतमा प्रत्येक वर्षको जुन महिनाको सुरुवातदेखि अगस्ट महिनाको अन्त्यसम्म यो नियम लागू हुँदै आएको छ । कुवेतमा तीव्र गर्मी र बढ्दो तापक्रमका कारण मजदुरहरूको स्वास्थ्यमा पर्न सक्ने जोखिम न्यूनीकरण गर्नु र व्यावसायिक सुरक्षा मापदण्डलाई सुदृढ बनाउन यो कदल चालिएको हो ।
बुधबार बिहान PAM द्वारा जारी विज्ञप्ति अनुसार, यो आदेशले जुन १ देखि अगस्ट ३१ सम्म बिहान ११:०० बजेदेखि दिउँसो ४:०० बजेसम्म खुला क्षेत्रमा काम गर्न निषेध गरेको छ। "यो आदेश श्रम बजारलाई नियमन गर्ने र श्रमिकहरूको सुरक्षा सुनिश्चित गर्ने सान्दर्भिक कानूनहरूमा आधारित छ," PAM का महानिर्देशक इन्जिनियर रबाब अल-असेमीले उल्लेख गरेका छन।
"यसले रोजगारदाताहरूलाई आफ्ना कर्मचारीहरूलाई चिसो पानी, प्राथमिक उपचार सामग्री, र उपयुक्त विश्रामको व्यवस्था गर्न बाध्य पार्छ ताकि राम्रो काम गर्ने वातावरण सुनिश्चित हुन सकोस्," उनले स्पष्ट पारे ।
उक्त नियम उल्लंघन गर्ने कम्पनी वा रोजगारदाताहरूलाई कुवेतको श्रम कानुन अनुसार कानुनी कारबाही र जरिवाना गरिने चेतावनी दिइएको छ।
