- ट्रेण्डिङ :
कुवेत सिटी – कुवेत सरकारले आफ्नो डिजिटल रूपान्तरणको अभियानलाई थप सशक्त बनाउँदै सेवाग्राहीका लागि एक महत्त्वपूर्ण सुविधा थप गरेको छ। पब्लिक अथोरिटी फर सिभिल इन्फर्मेसन (PACI) ले अब नागरिक तथा आप्रवासी कामदारहरूका लागि 'पुरानो ठेगानाको प्रमाणपत्र' (Certificate of Previous Addresses) डिजिटल रूपमै उपलब्ध गराउन थालेको हो। यो सेवा कुवेतको एकीकृत सरकारी एप 'साहेल' (Sahel) मार्फत कार्यान्वयनमा ल्याइएको छ।
यो नयाँ व्यवस्थासँगै कुवेतमा कार्यरत लाखौं नेपाली श्रमिकसहित सम्पूर्ण विदेशी समुदाय र स्थानीय नागरिकहरूले अब आफ्नो आवासीय इतिहास प्रमाणित गर्न सरकारी कार्यालयको चक्कर लगाउनुपर्ने बाध्यता अन्त्य भएको छ।
यसअघि आफ्नो पुरानो ठेगानाको प्रमाणित विवरण वा 'एड्रेस हिस्ट्री' लिनका लागि सेवाग्राहीहरू दक्षिण सुराइयास्थित PACI को मुख्य कार्यालय वा अन्य सेवा केन्द्रहरूमा भौतिक रूपमा उपस्थित हुनुपर्ने व्यवस्था थियो। कार्यालय पुगेर टोकन लिने, लामो लाइनमा बस्ने र कागजी प्रक्रिया पूरा गर्नुपर्दा सेवाग्राहीहरूको समय र पैसा दुवै खर्च हुने गरेको थियो।
PACI का अनुसार, डिजिटल सेवाको सुरुवातसँगै अब सेवाग्राहीले आफ्नै मोबाइलबाट केही मिनेटभित्रै यो प्रमाणपत्र प्राप्त गर्न सक्नेछन्। यसले सरकारी कार्यालयहरूमा हुने अनावश्यक भीडभाड कम गर्ने र प्रशासनिक दक्षता बढाउने लक्ष्य राखिएको छ। विशेषगरी कार्यव्यस्तताका कारण कार्यालय समयमा बिदा मिलाउन नसक्ने कामदारहरूका लागि यो सेवा 'वरदान' सावित हुने देखिएको छ।
यो प्रमाणपत्र किन आवश्यक छ?
कुवेतमा बसोबास गर्नेहरूका लागि 'पुरानो ठेगानाको प्रमाणपत्र' विभिन्न कानुनी र प्रशासनिक कामहरूमा अनिवार्य मानिन्छ। मुख्यतया निम्न कार्यहरूका लागि यो कागजात आवश्यक पर्दछ:
१. रोजगारी परिवर्तन (Sponsorship Transfer): एक रोजगारदाताबाट अर्कोमा जान वा 'खादिम' भिसाबाट 'नुजरा' (कम्पनी) भिसामा सर्न कहिलेकाहीँ ठेगानाको इतिहास मागिन्छ।
२. बैंकिङ प्रक्रिया: नयाँ बैंक खाता खोल्न वा ठूलो कर्जा (Loan) लिने प्रक्रियामा स्थायी बसोबासको प्रमाणका रूपमा यसलाई प्रयोग गरिन्छ।
३. तेस्रो मुलुक बसाइँसराइ: कुवेतबाट युरोप, अमेरिका, क्यानडा वा अष्ट्रेलिया जस्ता देशहरूमा बसाइँ सर्न वा 'इमिग्रेसन' प्रक्रिया अगाडि बढाउन विगतको बसोबासको रेकर्ड अनिवार्य हुन्छ।
४. कानुनी मामिला: अदालत वा प्रहरीसँग सम्बन्धित कतिपय कानुनी प्रक्रियाहरूमा आफ्नो विगतको ठेगाना प्रमाणित गर्नुपर्ने हुन्छ।
साहेल एपबाट प्रमाणपत्र लिने सरल विधि
साहेल एपमार्फत यो प्रमाणपत्र प्राप्त गर्न अत्यन्तै सरल प्रक्रिया तय गरिएको छ। सेवाग्राहीले निम्न चरणहरू पालना गर्नुपर्नेछ:
*लगइन: आफ्नो मोबाइलमा रहेको 'Sahel App' खोली आफ्नो सिभिल आईडी र कुवेत मोबाइल आईडीलगायतका विवरणमार्फत लगइन गर्नुहोस्।
*सेवा छनौट: एपको गृहपृष्ठको तल्लो भागमा रहेको 'Services' (सेवाहरू) ट्याबमा क्लिक गर्नुहोस्।
*निकायको छनौट: सरकारी निकायहरूको सूचीबाट 'Public Authority for Civil Information' (PACI) छनौट गर्नुहोस्।
*प्रमाणपत्र डाउनलोड: त्यहाँ उपलब्ध विभिन्न विकल्पहरूमध्ये 'Certificates' मा जानुहोस् र 'Certificate of Previous Addresses' (पुरानो ठेगानाको प्रमाणपत्र) विकल्पमा क्लिक गरी आवश्यक प्रक्रिया पूरा गर्नुहोस्।
प्रक्रिया पूरा भएपछि डिजिटल प्रमाणपत्र एपमै प्राप्त हुनेछ, जसलाई आवश्यकता अनुसार प्रिन्ट गर्न वा डिजिटल रूपमै पेस गर्न सकिनेछ।
