- ट्रेण्डिङ :
कुवेत - वैदेशिक रोजगारीको सिलसिलामा कुवेतमा रहेकी अञ्जु माया स्याङ्तानको उपचारका लागि यहाँस्थित नेपाली समुदायले आर्थिक सहयोग जुटाएको छ । स्वास्थ्यमा गम्भीर समस्या देखिएपछि अस्पताल भर्ना भएकी स्याङ्तानको कमजोर आर्थिक अवस्थालाई ध्यानमा राख्दै नेवा: गुठी कुवेत र नेपाल आदिवासी जनजाति महासंघ कुवेतको सक्रियतामा सहयोग संकलन गरिएको हो ।
राहदानी नं. PA1496153 भएकी स्याङ्तानलाई केही समयअघि स्वास्थ्य परीक्षणका क्रममा मृगौलामा समस्या देखिएको थियो । हाल उनको कुवेतस्थित अल सबाह अस्पतालमा उपचार भइरहेको छ। उनको उपचारमा सहयोग पुर्याउने उद्देश्यले नेवा: गुठी कुवेतकी प्रतिनिधि लक्ष्मी श्रेष्ठको विशेष पहलमा संकलन गरिएको ४५० कुवेती दिनार (करिब २ लाख २१ हजार ८ सय नेपाली रुपैयाँ) हालै बिरामीका सहकर्मीमार्फत हस्तान्तरण गरिएको छ ।
सहयोग हस्तान्तरणका क्रममा १३ जुन २०२६ मा नेपाल आदिवासी जनजाति महासंघ कुवेतका अध्यक्ष बलबहादुर काम्बाङ र नेवा: गुठी कुवेतका अध्यक्ष नवीन श्रेष्ठ लगायतका प्रतिनिधिहरूले अस्पताल पुगेर बिरामीको स्वास्थ्य अवस्थाबारे स्थलगत जानकारी लिएका थिए । नेवा: गुठीका उपाध्यक्ष ध्रुव श्रेष्ठले बिरामीको वर्तमान स्वास्थ्य अवस्था र उपचार प्रक्रियाबारे जानकारी गराउँदै संकलित रकमले तत्कालको उपचार खर्चमा राहत मिल्ने बताउनुभयो।
सामाजिक कार्यमा सक्रिय लक्ष्मी श्रेष्ठका अनुसार अञ्जु मायाको थप उपचारका लागि अझै आर्थिक स्रोतको आवश्यकता रहेको छ । सहयोग गर्न इच्छुक महानुभावहरूले बिरामीको मोबाइल नम्बर (+965 67751667) वा लक्ष्मी श्रेष्ठको नम्बर (+965 99498713) मा सम्पर्क गर्न सक्ने व्यवस्था मिलाइएको छ।
उपचारका लागि सहयोग प्राप्त भएपछि अञ्जु माया र उनको परिवारले सहयोगी संघ-संस्था तथा व्यक्तिहरूप्रति हार्दिक आभार व्यक्त गरेका छन्। नेवा: गुठी र जनजाति महासंघले आगामी दिनमा पनि समस्यामा परेका नेपालीहरूको हितमा मानवीय सेवाका कार्यहरूलाई निरन्तरता दिने प्रतिबद्धता व्यक्त गरेका छन्।
