- ट्रेण्डिङ :
लगातारको वर्षासँगै आएको पहिरोका कारण गण्डकी प्रदेशका ४ सडक अवरुद्ध भएका छन् । केही सडक पूर्ण रूपमा अवरुद्ध भएका छन् भने एउटा सडकमा एकतर्फी मात्र सवारी सञ्चालन भइरहेको छ ।
नवलपुरको गैँडाकोट नगरपालिका ३ को बिसपानी नजिक कालिगण्डकी करिडोर सडक खण्डमा पहिरो र ढुंगामाटो खस्दा सडक पूर्ण रूपमा अवरुद्ध भएको प्रहरीले जनाएको छ ।
स्याङ्जाको पुतलीबजार नगरपालिका १४ सम्सेबोला क्षेत्रमा रुखसहितको पहिरो खसेको छ । केही समय अवरुद्ध सिद्धार्थ राजमार्ग एकतर्फी सञ्चालनमा आएको छ।
म्याग्दीको बेनी नगरपालिका–४ घुमाउनेभीरस्थित बेनी दरबाङ सडक खण्डमा माटोसहितको पहिरो खसेपछि सडक पूर्ण रूपमा अवरुद्ध भएको छ । यस्तै, अन्नपूर्ण गाउँपालिका २ नैनीभीर क्षेत्रमा पहिरो खस्दा बेनी जोमसोम सडक पनि पूर्ण रूपमा बन्द भएको प्रहरीले जनाएको छ ।
वर्षायाममा बाढी, पहिरो तथा डुबानको जोखिम रहेका ठाउँमा अत्यावश्यक कामबाहेक यात्रा नगर्न प्रहरीले आग्रह गरेको छ ।
