- ट्रेण्डिङ :
कुवेत, १० अक्टोबर (२०२६) - खाडी मुलुक कुवेतमा कार्यरत संखुवासभालीहरूको सामाजिक संस्था संखुवासभा समाज कुवेतले यस वर्ष आयोजना गर्ने भनिएको दशैं–तिहार तथा वार्षिकोत्सव कार्यक्रम रद्द गर्ने निर्णय गरेको छ । सो कार्यक्रमका लागि छुट्याइएको रकम क्यान्सर रोगले ग्रस्त एक नेपालीको उपचारमा सहयोग गर्ने निर्णय समाजले गरेको हो ।
समाजको शुक्रबार बसेको बैठकले संखुवासभा जिल्ला, मादी नगरपालिका–३, माचखर्क घर भई हाल भारतको दिल्लीस्थित राजीव गान्धी अस्पतालमा क्यान्सरको उपचार लिइरहेका दिल बहादुर गुरुङलाई ५०,१९९ रुपैयाँ आर्थिक सहयोग उपलब्ध गराउने निर्णय गरेको हो।
समाजका अध्यक्ष विजय लामाका अनुसार भव्य कार्यक्रम आयोजना गर्नुभन्दा आवश्यकतामा परेका व्यक्तिलाई सहयोग गर्नु बढी अर्थपूर्ण हुने ठानी यस्तो निर्णय गरिएको हो।
उनले भने, "यो रमाउने समय होइन, कसैको ज्यान जोगाउने सहयोग पहिलो आवश्यकता हो भन्ने ठानेर हामीले यो निर्णय गरेका हौँ।"
अध्यक्ष लामाले भविष्यमा पनि यस्ता समस्या आइपरेमा सकेसम्म सहयोग गर्न समाज प्रतिबद्ध रहेको बताए।
संखुवासभा समाज कुवेतले स्थापनाको क्रमदेखि नै आफ्नो जिल्लामा मात्र सीमित नरही देशका विभिन्न ठाउँमा विपद्, रोग र विषम परिस्थितिमा परेका पीडितहरूलाई समय–समयमा आर्थिक तथा भौतिक सहयोग गर्दै आएको समाजले जनाएको छ। विदेशमा रहेका नेपाली समाजहरूले आफ्नो आम्दानी र स्रोतलाई स्वदेशमा आवश्यकता परेका व्यक्तिसम्म पुर्याउने यस्ता पहललाई सामाजिक उत्तरदायित्वको उदाहरणका रूपमा लिइएको छ।
उत्सव–समारोहजस्ता कार्यक्रम रद्द गरी त्यसको बजेटलाई मानवीय सहयोगमा परिचालन गर्ने संखुवासभा समाज कुवेतको यो निर्णयले सामाजिक संघ–संस्थाहरूको स्रोत र प्राथमिकताको उपयोग कसरी अझ प्रभावकारी बनाउन सकिने भन्ने संदेश दिएको छ। क्यान्सरजस्ता गम्भीर रोगको उपचारमा आर्थिक अभावका कारण संघर्ष गरिरहेका धेरै नेपालीहरूका लागि यस्ता सहयोग राहतको स्रोत बन्ने अपेक्षा गरिएको छ।
