- ट्रेण्डिङ :
एजेन्सी । कोरोना भाइरस संक्रमणले विश्वमै सबैभन्दा बढी प्रभाव परेको मुलुक अमेरिकामा पुनः अर्को खतरनाक संक्रमण देखिएको छ । हालै मात्र मस्तिष्क खाने अमिबा फेला परेको घटनाले अमेरिकामा थप त्रास फैलिएको हो । संख्यात्मक रुपमा महामारीको अवस्था नभए पनि जनस्वास्थ्यका हिसाबले अमिबाको संक्रमण निकै घातक देखिएको छ ।
यो अमिबा मानव शरीरमा नाकबाट प्रवेश गर्यो भने निकै घातक सिद्ध हुन्छ । नाकबाट अमिबाको संक्रमण भएकाहरु मध्ये ९० देखि ९५ प्रतिशतको मृत्यु हुन्छ । अमेरिकी राज्य टेक्ससमा निग्लेरिया फोउलेरी (Neagleria fowleri) को संक्रमणबाट ८ सेप्टेम्बरमा ६ बर्षीय बालकको मृत्यु भएको थियो । परीक्षणका क्रममा उनमा अमिबाको संक्रमण पुष्टि भएको थियो । ती बालकमा अमिबाको संक्रमण पोखरीमा पौडी खेल्न जाँदा या घरमा आउने पानीका कारण संक्रमण भएको स्थानीय अधिकारीहरुले अनुमान गरेका छन ।
त्यसैगरी अगस्तमा पनि यही मस्तिष्कमा आक्रमण गर्ने अमिबाका कारण फ्लोरिडामा एकजना १३ बर्षीय बालकको मृत्यु भएको थियो । त्यसबेला टेक्सस राज्यका ८ वटा शहरहरुमा यो अमिबाबाट सावधान रहन चेतावनी जारी गरिएको थियो । घरमा आउने पानीको प्रयोग नगर्न पनि आग्रह गरिएको थियो । घर घरमा आपूर्ति हुने पानीको सफाईपछि केही शहरहरुबाट यो चेतावनी फिर्ता लिइएको थियो ।
अमेरिकाको सरकारी स्वाथ्य निकाय सेन्टर फर डिजिज कन्ट्रोल एण्ड प्रिभेन्सन (सिडिसी) ले माटो, तातो पानीको पोखरी, नदी, झरना र राम्ररी सरसफाई नगरिएको स्विमिङ पुलमा निग्लेरिया फोउलेरी (Neagleria fowleri) अमिबा हुन सक्ने सम्भावना ब्यक्त गरेको छ । सिडिसीले यो अमिबाको आक्रमणलाई अपवादको रुपमा आएको भनेको छ ।
यद्यपी यसको आक्रमण भएपछि मृत्युको सम्भावना अधिक रहने गरेको छ । सिडिसीले जनाए अनुसार सन २००९ देखि १८ को बीचमा मस्तिष्क खाने निग्लेरिया फोउलेरी (Neagleria fowleri) अमिबा संक्रमणका ३४ वटा केसहरु देखिएका छन । त्यसैगरी सन १९६२ देखि २०१८ को बीचमा १४५ जना संक्रमित भएको तथ्यांक छ । यी मध्ये केवल ४ जना मात्रै बाँच्न सफल भएको सिएनएनले जनाएको छ ।
