बुधवार, कार्तिक १९ गते २०८३
- ट्रेण्डिङ :
- # समाज
- # मनाेरञ्जन
एजेन्सी । कोरोना भाइरस कहाँ कहाँ बस्छ ? यस बारेमा थुप्रै प्रश्नहरु उब्जिएका छन । यस बारे विभिन्न सञ्चार माध्यमहरुमा समाचारहरु पनि प्रकाशित भएका छन । तर भाइरस कहाँ छ ? भनेर पत्ता लगाउने उपाय जनस्तरमा छैन ।
त्यसैले भाइरस कहाँ छ भनेर कसरी पत्ता लगाउने ? यो विषय सबैका लागि निकै महत्वपूर्ण र जटिल प्रश्न बनेको छ । यही प्रश्न अर्थात समस्यालाई सम्बोधन गर्न आगामी दिनहरु केही सहज हुने भएको छ ।
क्यानाडाको एक कम्पनीले हावामा भएका कोरोना भाइरस पत्ता लगाउने उपकरण बनाएको दावी गरेको छ । कोन्ट्रोल इनर्जी कर्प नामक कम्पनीले यस्तो दावी गरेको हो । यो कम्पनीले इन्डोर एयर क्वालिटी तथा मनिटरिङ इक्विपमेन्ट बनाउने काम धेरै अघिदेखि नै गर्दै आएको छ ।
कोरोना महामारी सुरु भएपछि यो कम्पनीले कोरोना भाइरसको पहिचान गर्न सक्ने उपकरण बनाउने काम सुरु गरेको थियो । कम्पनीले क्यानाडाको ओन्टरियोस्थित दुईवटा प्रयोगशालामा कोरोना भाइरस पत्ता लगाउने उपकरण बारे अनुशन्धान सुरु गरेको थियो ।
यो अनुशन्धानपछि कोन्ट्रोल इनर्जी कर्प कम्पनीले ‘बायोक्लाउड’ नामक उपकरण बनायो । यो उपकरणले हावा भित्र तान्छ र कोरोना भाइरस भए नभएको तथ्य पत्ता लगाउँछ । globalnews.co का अनुसार यो उपकरणले कुनै पनि स्थानको हावामा कोरोना भाइरस भए नभएको पत्ता लगाउँछ ।
यदी त्यहाँ पोजिटिभ नतिजा आयो भने त्यस स्थानमा रहेका मानिसहरुको कोरोना परीक्षण गराउनु पर्ने हुनसक्छ । स्कुल, कलेजका कक्षा कोठा, कार्यालय तथा भिडिभाड भएका स्थानहरुका लागि यो उपकरण उपयोगी सावित हुने कम्पनीले जनाएको छ ।
क्यानडाको वेस्टर्न युनिभर्सिटी अन्तर्गत माइक्रोबायोलोजीका प्रोफेसर डेविड हेनरिक्सले बायोक्लाउड उपकरणको परीक्षण गरेका छन । कंपनीले यो उपकरण नोभेम्बरसम्ममा बजारमा ल्याउने योजना बनाएको छ ।
यो उपकरणको मुल्य १२ हजार अमेरिकी डलर पर्ने कोन्ट्रोल इनर्जी कर्प कम्पनीले बताएको छ । कम्पनीले पहिलो चरणमा २० हजार थान बायोक्लाउड उपकरण उत्पादन गर्ने जनाएको छ ।
