मंसिर २४, २०७७ बुधवार
•
०९:३४:३७ बजे
बागलुङको गलकोट नगरपालिका–७ मल्मस्थित जनहित माध्यमिक विद्यालयमा सीसी क्यामेरा जडान गरिएको छ । सीसी क्यामेरा जडानका लागि विद्यालयका पूर्व विद्यार्थी तुलवीर थापाले १ लाख ६० हजार रुपैयाँ सहयोग गरेका थिए ।
प्रशासनिक कक्ष, कक्षाकोठा र विद्यालय परिसरमा गरी १४ थान सीसी क्यामेरा जडान गरिएको विद्यालय व्यवस्थापन समितिका अध्यक्ष ज्ञानबहादुर थापाले जानकारी दिए । विद्यालयको रेखदेख, सुरक्षादेखि कक्षा कोठामा सिकाइमैत्री वातावरण सिर्जना गर्न सीसी क्यामेराले सघाउने समितिको विश्वास छ ।
विद्यार्थी कक्षा कोठामा बस्दा पढाइमा ध्यान नदिने, अनावश्यक कुराकानीमा भुल्ने, शिक्षक पनि समयमा नआउनेजस्ता गतिविधिलाई सीसी क्यामेरामार्फत निगरानी र नियन्त्रण गरिने विद्यालय प्रशासनले जनाएको छ ।
‘सीसी क्यामेरा जडानले विद्यालयको भौतिक सम्पत्तिको सुरक्षामा पनि टेवा पुग्ने छ,’ अध्यक्ष थापाले भने ।
हाल जापानमा रहेका पूर्व विद्यार्थी थापाले विद्यालयको हित हेरेर सीसी क्यामेराका लागि सहयोग गरेको बताए । यसअघि थापा र उनका दाइ टेकबहादुर मिलेर मल्मका सार्वजनिकस्थलमा सीसी क्यामेरा जडानका लागि १ लाख ५० हजार रुपैयाँ सहयोग गरेका थिए ।
उनीहरूले केही वर्षअघि सोही विद्यालयको स्वर्ण जयन्तीका अवसरमा दिवंगत हजुरबुवा र बुवाको स्मृतिमा २ लाख २१ हजार रुपैयाँ बराबरको अक्षयकोष समेत खडा गरेका थिए । आफूले पढेको विद्यालय प्रतिको दायित्व सम्झेर सहयोग गरिएको तुलवीरले बताए ।
उनले गत महिना परेको आफ्नो जन्मदिनमा महावीर पुनको राष्ट्रिय आविष्कार केन्द्रलाई ५० हजार रुपैयाँ सहयोग गरेका थिए ।
जापानमा रेस्टुराँ व्यवसायमा आबद्ध तुलवीरले विपद्जन्य घटनाका कारण समस्यामा परेका परिवारलाई पनि बेलाबेलामा आर्थिक सहयोग गर्दै आएका छन् । आफू प्रवासमा रहे पनि गाउँप्रति उनको सहयोगी मन र भावना जोडिएको छ ।
