- ट्रेण्डिङ :
बागलुङ। बागलुङमा कोरोना संक्रमण बध्दै गएपछी बागलुङ नगरपालिकाका तीन वडामा निषेधाज्ञा जारी गरिएको छ । जिल्लामा कोरोना संक्रमणको दर बढ्दै गएपछि बुधबार एकै दिन नगरपालिकाको वडा नम्बर १२ स्थित जनताधन माविका विद्यार्थी शिक्षकसहित ३९ जनामा कोरोना संक्रमण पुष्टि भएपछि जिल्ला प्रशासन कार्यालयले वडा नम्बर १२,१३ र १४ मा निषेधाज्ञा जारी गरेको हो ।
भारतबाट बागलुङ आएका ३ जनामा केही दिनअघि कोरोना संक्रमण देखिएपछि उनीहरुको कन्ट्याक्ट ट्रेसिङ गर्दा थप ८ जनामा कोरोना पुष्टि भएको थियो । फेरि ती ८ जनाको कन्ट्याक्ट ट्रेसिङबाट ९८ जना विद्यार्थी र शिक्षकको स्वाब परीक्षण गर्दा ३९ जनामा कोरोना संक्रमण भएकाले बागलुङको बलेवा क्षेत्रका तीन वटा वडामा मंगलबार राति १२ बजेदेखि निषेधाज्ञा जारी गरिएको प्रमुख जिल्ला अधिकारी शिवकुमार कार्कीले बताए ।
बलेवा क्षेत्रका अत्यावश्यकीय सेवाबाहेक अन्य सबै विद्यालय, कार्यालय, नीजि तथा सार्वजनिक यातायात बन्द गरिएको छ । बलेवा हुँदै जाने कालीगण्डकी करिडोर र अन्य गन्तव्यका लागि बिचमा झार्न र राख्न नपाउने गरि सिधा यातायात भने सञ्चालन हुनेछ । बलेवा क्षेत्र बाहेक नगरपालिकाका जोखिमयुक्त विद्यालयका लक्षण देखिएका विद्यार्थीको प्रतिनिधिमूलक हिसाबले स्वाब लिएर नमुना परीक्षणको तयारी गरिएको उनको भनाई छ । बागलुङलाई नेपाल सरकारले कोरोना संक्रमण फैलिँदै गए पछि अति प्रभावित १४ जिल्लाको सूचिमा राखेको छ ।
सोमबारसम्मै जनताधन माविमा विद्यालय सञ्चालन भएकाले अन्य विद्यार्थीमा पनि संक्रमण फैलिएको आशंका बढेको छ । कोरोना संक्रमण पुष्टी भएका सबै विद्यार्थी र शिक्षकलाई घरमै आइसोलेसनमा राखिएको स्वास्थ्य कार्यालयका प्रमुख सुरज गुरौंले जानकारी दिए ।
