- ट्रेण्डिङ :
सहिद स्मारक ‘ए’ डिभिजन लिग फुटबलमा हिमालयन शेर्पा क्लबले सहज जित निकालेको छ ।
आज सम्पन्न खेलमा हिमालयनले च्यासल युथ क्लबलाई ३/१ गोल अन्तरले हराएको हो । हिमालयनको जितमा मुटम्बा पिस्टनले दुई गोल गरे । त्यस्तै सुरेश कुमालले एक गोल गरे ।
च्यासलका रुमेश बर्तौलाले एक गोल फर्काए । त्रिपुरेश्वरस्थित दशरथ रंगशालामा खेलको २५औं मिनेटमा मुटम्बाले गोल गर्दै हिमालयनलाई सुरुआती अग्रता दिलाएका थिए ।
कमल थापाको लामो पासमा च्यासलका डिफेन्डरले क्लियर गर्न नसकेको बललाई उनले गोलमा परिणत गरे । त्यस्तै खेलको ५७औं मिनेटमा मुटम्बाले व्यक्तिगत दोस्रो गोल गर्दै हिमालयनलाई २ शुन्यको अग्रता दिलाए ।
त्रिदेब गुरुङको कडा प्रहार च्यासलका गोलकिपर अर्पण कार्कीले आफ्नो कब्जामा लिन नसक्दा आएको रिबाउन्डमा मुटम्बाले पोस्टको जाली चुमाएका हुन् ।
त्यसैगरी ७६औं मिनेटमा रुमेशले गोल गर्दै च्यासललाई २/१ को स्थितिमा ल्याए ।
पेनाल्टी एरियाभित्र राजिब लोप्चनले दिएको पासमा अनमार्क रहेका रुमेशले गोल गरेका हुन् । तर, खेलको ८०औं मिनेटमा सुरेशले गोल गर्दै हिमालयनलाई ३/१ को जित दिलाए ।
उनले मनिष थापाको पासलाई सदुपयोग गरे ।
यो जितसँगै हिमालयनले ६ खेलमा ८ अंक जोडेर छैटौं स्थानमा उक्लिएको छ ।
च्यासलले ६ खेलमा ४ अंक जोडेर अंक तालिकाको १३औं स्थानमा रहेको छ ।
खेलमा हिमालयनका मुटम्बा म्यान अफ दि म्याच चुनिए ।
इमर्जिङ प्लेयरको अवार्ड च्यासलका राजिब लोप्चनले प्राप्त गरे ।
