शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
ब्रिगेड ब्वाईज क्लब (बीबीसी)लाई घरेलु मैदानमा १–० अन्तरले पराजित गर्दै मनाङ मर्स्याङ्दी क्लब सहिद स्मारक ए डिभिजन लिगमा कम्तीमा एक दिनका लागि शीर्षस्थानमा फर्किएको छ ।
पोखरा रंगशालामा शनिबार भएको खेलमा कप्तान अञ्जन विष्टले पहिलो हाफको इन्जुरी समयमा गरेको गोल निर्णायक बन्दा मनाङले पाँचौ जित निकाल्यो । जितसँगै मनाङले ७ खेलबाट १६ अंक बनाएको छ र शीर्षस्थानमा रहेको छ ।
यता, एक खेल कम खेलको मच्छिन्द्र फुटबल क्लब १४ अंकसहित दोस्रो स्थानमा छ । आइतबार साँझ पौने ५ बजे हुने खेलमा मच्छिन्द्रले विभागीय टोली नेपाल पुलिस क्लबलाई पराजित गरे शीर्षस्थानमा उक्लने छ ।
यदि हार वा बराबरले भने मनाङ शीर्षस्थानमै हुनेछ । आइतबारको खेलले एएफसी कप–२०२२ छनोटमा स्थान बनाउने टोलीको टुङ्गो समेत लाग्नेछ ।
सातौँ चरणको शीर्षस्थानमा रहने टोली यस सिजनको एएफसी कपमा छनोट हुनेछ । पोखरा रंगशालालाई होम मैदान बनाएपछि दोस्रो जित निकाल्ने क्रममा अञ्जनले भारतीय खेलाडी दयानन्द सिंहको हेड पासमा हेड गोल गरे ।
यसअघि पहिलो हाफमा बीबीसीका शिशिर लेखीले पाएको पेनाल्टी सदुपयोग गर्न सकेनन् ।
उनले पाएको पेनाल्टीलाई बाहिर प्रहार गरे । योसँगै मनाङले घरेलु मैदानमा लगातार दोस्रो जित निकालेको छ ।
गत शनिबार पुलिसलाई ३–१ ले हराएको थियो । यता, पराजित बीबीसी ७ खेलबाट ५ अंकसहित १२औँ स्थानमा छ।
आज काठमाडौँमा भएको पहिलो खेलेमा थ्री स्टारले प्रतिद्वन्द्वी जावलाखेल युथ क्लबलाई २–१ ले पराजित गर्दै पाँचौ स्थानमा उक्लियो ।
आजको तेस्रो खेलमा अहिले पौने ५ बजे संकटा क्लब र च्यासल युथ क्ल्ब भिड्नेछन् ।
