आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
काठमाडौंको नयाँबानेश्वरस्थित एनआईसी एशिया बैंकको रकम लुट्ने चार जनालाई प्रहरीले पक्राउ गरेको छ ।
पक्राउ पर्नेमा एक जना बैंकका कलेक्टर पदमा कार्यरत कर्मचारी समेत रहेका छन् । प्रहरीका अनुसार अनुसन्धानबाट चोरीमा कर्मचारीकै संलग्नता रहेको खुलेपछि बैंकका कर्मचारी (कलेक्टर) प्रदीप खत्री पक्राउ परेका हुन ।
उनी नै यो लुटपाट काण्डको मुख्य योजनाकार पनि रहेको अनुसन्धाबाट खुलेको छ । प्रहरीका अनुसार खत्रीले एनआईसी एशिया बैंकको बानेश्वर शाखामा कुनै पनि कम्पनीले बैंकमा ठूलो रकम जम्मा गर्न खोजे सम्बन्धित ठाउँमै पुगेर रकम संकलन गर्ने गर्दथे । रकम लुटपाटमा संलग्न विमल तामाङ, अनिस खड्का र शक्ति पौडेल अहिले प्रहरी नियन्त्रणमा छन ।
प्रहरीका अनुसार उनीहरूले एनआईसी एशिया बैंकको बानेश्वर शाखाको १६ लाख तीस हजार चार सय २४ रुपैयाँ पुस १८ गते लुटेका थिए ।
रकम लुटेपछि उनीहरुले एकआपसमा भाग लगाएको पनि प्रहरीले जनाएको छ । चार जनामध्ये शक्ति पौडेलको भागमा छ लाख तीस हजार चार सय चौबीस रुपैयाँ, बिमल तामाङको भागमा तीन लाख रुपैयाँ प्रदीप खत्रीको भागमा तीन लाख रुपैँया, अनिष खड्काको भागमा चार लाख रुपैयाँ परेको प्रहरी जनाएको छ ।
प्रहरीले उनीहरुबाट तेह्र लाख छयालीस हजार बरामद गरेको छ भने बाँकी रकम उनीहरुले खर्च गरेको खुल्न आएको छ ।
प्रदिप खत्रीले १८ पुसमा बानेश्वरस्थित वडा १० को कार्यालयबाट नगद १२ लाख ४५ हजार र मेटलाइफ इन्स्योरेन्सबाट नगद ३ लाख २५ हजार ४ सय २४ संकलन गरेर आउँदा उनको योजना अनुरुप चोरी भएको थियो । उनीसँगै मोटरसाइकमा बैंककी महिला कर्मचारी आरुसी भण्डारी रहेको प्रहरी जनाएको छ ।
मध्य बानेश्वरस्थित ग्लोबल कलेज अगाडि पुगेपछि भने मोटरसाइकलको पेट्रोल सकिन लागेको भन्दै खत्रीले मोटरसाइकल रोकेका थिए । सोही क्रममा विमल तामाङ, अनिस खड्का र शक्ति पौडेलले मोटरसाइकलको पछाडि बसेकी आरुसी भण्डारीले बोकेको पैसाको ब्याग लुटेर भागेको प्रहरी जनाएको छ ।
अनुसन्धानका क्रममा प्रदीपको भूमिका शंकास्पद देखिएपछि १८ पुसमै नियन्त्रणमा लिएर अनुशन्धान गरेपछि घटना उनकै योजना अनुसार भएको खुलेको थियो ।
