आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
काठमाडौं र ललितपुर जिल्लाका १२ देखि १७ वर्ष उमेर समूहका बालबालिकालाई कोरोनाबिरुद्धको खोप लगाउने तयारी भएको छ ।
बालबालिकाका लागि फाइजर खोप पठाइसकिएको र अब पालिकाहरुले समन्वय गरेर खोप दिने स्वास्थ्य तथा जनसंख्या मन्त्रालयले जनाएको छ ।
भक्तपुरसहित अरु जिल्लामा भने मोडेर्ना खोप दिने तयारी छ । यसअघि सरकारले काठमाडौं उपत्यकासहित २० जिल्लाका बालबालिकाहरुलाई फाइजर खोप लगाउने भनेको थियो ।
५७ जिल्लाका १२ देखि १७ वर्ष उमेर समूहका बालबालिकालाई यही चार गतेदेखि नै मोडेर्ना खोप दिइएको छ ।
काठमाडौं, भक्तपुर, ललितपुर, काभ्रे, चितवन, सिन्धुली, डडेलधुरा, सुर्खेत, मोरङ, सुनसरी, सप्तरी, धनुषा, पर्सा, कास्की, बाग्लुङ, रुपन्देही, बाँके, दाङ र कैलालीमा भने फाइजर खोप दिने भनेर सरकारले सूचना नै निकालेको थियो । तर खोपका लागि चाहिने सिरिञ्ज अभाव भएको भन्दै यी जिल्लामा खोप अभियान स्थगित गरिएको थियो ।
अहिले फेरि फाइजर खोप कम भएको भन्दै सरकारले काठमाडौं र ललितपुरबाहेकका अरु जिल्लाका बालबालिकालाई मोडेर्ना खोप दिने तयारी गरेको छ ।
ती जिल्लाका बालबालिकाले कहिलेदेखि खोप पाउने भन्ने अझै टुङ्गो लागेको छैन । बालबालिकालाई विद्यालयबाटै खोप दिने तयारी गरिएको छ ।
