- ट्रेण्डिङ :
जिल्ला प्रशासन कार्यालय काठमाडौंले दर्शक राखेर फुटबल खेलको आयोजना गर्न स्वीकृति दिएको छ ।
शुक्रबार आदेश जारी गर्दै जिल्ला प्रशासन कार्यालय काठमाडौंले पूर्व निर्धारित अन्तराष्ट्रिय स्तरका खेलकुद प्रतियोगितामा सिमित दर्शक राखेर स्वास्थ्य मापदण्डको पूर्ण रुपमा पालना गराउँदै प्रतियोगिता सञ्चालन गर्न स्वीकृति दिएको हो ।
अखिल नेपाल फुटलब संघ (एन्फा) ले आज दशरथ रंगशालामा अफ्रिकी राष्ट्र मरिसससँग मैत्रीपूर्ण फुटबल खेलको आयोजना गरेको छ । दुई मैत्रीपूर्ण फुटबल खेलका लागि मरिससको राष्ट्रिय टिम नेपालमा रहेको छ ।
अर्को खेल मंगलबार खेलाइने तय भएको छ । कोभिड–१९ को तेस्रो लहरकाबीच हुन लागेको प्रतियोगितामा एन्फाले सिमित दर्शक राखेर सञ्चालन गर्ने तयारी गरेको छ ।
शुक्रबार प्रमुख जिल्ला अधिकारी गोबिन्द प्रसाद रिजालले आदेश जारी गर्दै पूर्व निर्धारित अन्तराष्ट्रिय प्रतियोगिता सिमित दर्शक राखेर सञ्चालन गर्न स्वीकृति दिएका हुन् ।
यो पछिल्लो आदेशसँगै पूर्व निर्धारित अन्तराष्ट्रिय स्तरका खेलकुद प्रतियोगिता दर्शक राखेर सञ्चालन गर्न पाईने भएको छ ।
स्थानीय प्रशासनको स्वीकृतिसँगै करिब ५ हजार दर्शकले स्वास्थ्य मापदण्ड पालना गरि दशरथ रंगशालामा आज मरिससविरुद्धको नेपालको खेल हेर्न पाउनेछन् ।
