शुक्रवार, कार्तिक २१ गते २०८३
- ट्रेण्डिङ :
कंगोमा विद्रोहीको गोली लागेर घाइते भएका नेपाली शान्ति सैनिकको उपचारका क्रममा मृत्यु भएको छ । सैनिक जनसम्पर्क तथा सूचना निर्देशनालयका अनुसार नेपाली शान्ति सैनिक सुर्खेत गुर्माकोट–१४ निवासी सिपाही अनिल गुरुङको मृत्यु भएको हो ।
उनको बुनियामा रहेको लेबल–२ अस्पतालमा उपचारका क्रममा मृत्यु भएको हो । घाइते भएका उनलाई हेलिकोप्टरमार्फत उद्धार गरी अस्पताल लगिएका थियो ।
प्रमुख सेनानी निखिल कुँवरको कमाण्डमा सञ्चालन भएको खोजतलास कारबाहीमा विद्रोहीको अब्जेक्टिभ कब्जा गरी जमिन होल्डपछि विद्रोहीबाट भएको फायरमा मिसनमा कार्यरत गुरुङलाई गोली लागेको थियो ।
उनी संयुक्त राष्ट्रसंघको आह्वानमा शान्ति स्थापनार्थ कंगोमा तैनाथ शान्ति सेनाको पहिलो डफ्फामा कार्यरत थिए । नेपाली सेनाका प्रवक्ता सहायक रथी नारायण सिलवालले दिएको जानकारी अनुसार पहिला विद्रोहीको कब्जामा रहेको जमिनलाई उनीहरुबाट छुटाइ नेपाली सेना उक्त स्थानमा पुगेको थियो ।
त्यसै क्रममा अज्ञात स्थलबाट विद्रोहीले चलाएको गोली लागि उनी घाइते भएका थिए। अप्रेसन बाली नाम दिइएको सो कारबाहीका बाँकी सबै सदस्य सैनिक सुरक्षित रहेको सिलवालले बताए ।
