- ट्रेण्डिङ :
कोरोना भाइरस (कोभिड–१९) बाट सङ्क्रमित हुनेको सङ्ख्याभन्दा निको हुनेको सङ्ख्या झण्डै दोब्बर देखिएको छ ।
स्वास्थ्य तथा जनसङ्ख्या मन्त्रालयका अनुसार गएको २४ घण्टामा ९७९ जनामा कोरोना सङ्क्रमण देखिएको छ भने सोही समयमा एक हजार ७३६ जना सङ्क्रमण मुक्त भएका छन् । मन्त्रालयका प्रवक्ता डा जागेश्वर गौतमका अनुसार कोरोनाबाट मुक्त हुनेको सङ्ख्या ३० हजार ६७७ पुगेको छ । अब देशभर सक्रिय सङ्क्रमितको सङ्ख्या १६ हजार २५९ रहेको छ ।
देशका विभिन्न प्रयोगशालामा परीक्षणका क्रममा पछिल्लो २४ घण्टामा ९७९ जनामा कोरोना पुष्टि भएको छ । मन्त्रालयका अनुसार देशभरका विभिन्न प्रयोगशालामा नौ हजार २१८ जनाको पीसीआर परीक्षण गर्दा थप ९७९ जनामा कोरोना भाइरसको सङ्क्रमण पुष्टि भएको हो । अघिल्लो दिनकै हाराहारीमा सोमबार पनि कोरोना पुष्टि भएको हो । आइतबार ९८० जनामा सङ्क्रमण पुष्टि भएको थियो । उक्त समाचार आजको गोरखापत्रमा छापिएको छ ।
