शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
महाकाली नदीमा बगेर शुक्रबार बैतडीका दुई किशोरी बेपत्ता भएका छन् । बेपत्ता हुनेमा दशरथचन्द नगरपालिका– ८ का १६ वर्षीया कविता टमटा र १५ वर्षीया सङ्गीता टमटा रहेको बैतडीका सहायक प्रमुख जिल्ला अधिकारी खगेन्द्र भारतीले जानकारी दिए ।
शुक्रबार दिउँसो एक बजे नुहाउने क्रममा महाकाली नदीस्थित नगतडीबाट उनीहरू नदीमा बगेका थिए । दिउँसै बगेर बेपत्ता भए पनि प्रहरी र प्रशासनलाई भने बेलुका मात्र खबर गरिएको जनाइएको छ ।
किशोरी बेपत्ता भएकाे खबर पाउनासाथ सुरक्षा निकाय परिचालन गरिएको छ । घटनाबारे बुझ्नका लागि सहायक प्रमुख जिल्ला अधिकारी खगेन्द्र भारतीसमेत थप बुझ्नका लागि घटनास्थल पुगेका छन् ।
कालीगण्डकीमा वृद्व बगे
यसैगरी, तनहुँको देवघाट गाउँपालिका–५ बेणी सङ्गमस्थित कालीगण्डकी नदीमा नुहाउने क्रममा शुक्रबार एक वृद्व समेत बगेका छन् । दोलखाकाे बैधेश्वर गाउँपालिका–३ घर भएका ७६ वर्षीय जङ्गबहादुर खड्का देवघाटबाट बगेर नदीमा बेपत्ता भएका हुन् ।
जिल्ला प्रहरी कार्यालय तनहुँका अनुसार कालीगण्डकी किनारमा नुहाउने क्रममा उनलाइ अचानक नदीले बगाएकाे थियाे । वृद्ध बेपत्ता भएपछि तत्काल प्रहरी परिचालन गरी खोजलतास गरेकाे तर फेला पार्न नसकिएको प्रहरीले जनाएको छ ।
शुक्रबार साँँझ अबेरसम्म प्रहरी टोलीले खोजतलास गर्दा पनि फेला नपरेको र खोजी जारी रहेको तनहुँका प्रहरी नायब उपरीक्षक युवराज खड्काले जानकारी दिए ।
