- ट्रेण्डिङ :
पछिल्लो समय आईसीसी क्रिकेट विश्वकप लिग टू मा उत्कृष्ट प्रदर्शन गर्दै ८ मध्ये ७ खेल जितेको नेपालले ओडीआई वरीयतामा दुई स्थान माथि उक्लिएको छ ।
आईसीसीले बुधबार अपडेट गरेको ओडीआईतर्फको वरीयतामा नेपाल दुई स्थान सुधार गर्दै १७औं स्थानमा उक्लिएको हो । नेपालले यूएई र अमेरिकालाई पछि पारेको हो ।
नेपालले घरेलु मैदानमा भएको स्कटल्याण्ड र नामिबियासँगको लिग टू मा चारवटै खेल जितेको थियो भने यूएईमा भएका चार खेलमा तीन खेल जितेको थियो ।
लगातार उत्कृष्ट प्रदर्शन गरेपछि वरियतामा पनि नेपालले फड्को मारेको हो । सात राष्ट्र सम्मिलित लिग टू मा नेपाल ३२ खेलबाट ३२ अंक जोड्दै पाँचौ स्थानमा छ ।
लिग टू मा शीर्ष तीनमा रहेर विश्वकप छनोटमा स्थान बनाउन नेपालले बिहीबारदेखि घरेलु मैदानमा हुने यूएई र पपुवा न्युगिनीसम्मिलित शृखंलामा चारवटै खेल जित्नुपर्नेछ ।
नेपाल भन्दा पछि रहेको अमेरिका १८औं, युएई १९औं र पपुवा न्युगिनी २०औं स्थानमा छन् । भारत शीर्ष स्थानमा रहँदा अष्ट्रेलिया दोस्रो स्थानमा छ । एसोसिएट राष्ट्रतर्फ स्कटल्याण्ड सबैभन्दा माथि १२औं स्थानमा छ ।
विश्वकप सुपर लिग खेलिरहेको नेदरल्याण्ड्स १४औं स्थानमा छ ।
