आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
मदिरा सेवन गरी सुनसरीको सप्तकोसी नदीछेउमा युवती समूहबीच ‘ग्याङ फाइट’ भएको छ ।
सुनसरीको बराहक्षेत्र नगरपालिका–९ स्थित सप्तकोसी नदी किनारमा युवतीबीच ‘ग्याङ फाइट’ भएको हो । तीन जना युवतीमाथि भएको निर्घात कुटपिटमा संलग्न एक जनालाई प्रहरीले पक्राउ गरेको छ । दुई समूहबीच विवाद भएको प्रहरीको भनाइ छ । पाँचजनाको समूहले अर्को समूहलाई निर्घात घुटपिट र आक्रमण गरेको थियो ।
जिल्ला प्रहरी कार्यालय सुनसरीले घटनामा संलग्नमध्ये एकजनालाई पक्राउ गरिएको जनाएको छ । कुटपिटमा संलग्न आरोपमा बराहक्षेत्रका १९ वर्षीया कृति लिम्बू पक्राउ परेका छन् ।
सप्तकोसीको राजावास क्षेत्रमा यो घटना भएको सुनसरीका प्रहरी प्रवक्ता एवं डीएसपी राजकुमार राईले जानकारी दिए । घटनामा संलग्न बराह क्षेत्र–९ बस्ने १९ वर्षीया सन्जिता राई, १९ वर्षीया निहाङ राई, बराह क्षेत्र–८ सैनिक टोल बस्ने १८ वर्षीया दुर्गा राई र बिनिता उरावँको खोजी भइरहेको प्रहरीले जनाएको छ ।
घटनामा बराह क्षेत्र ८ का १७ वर्षीया सन्ध्या परियार, १६ वर्षीया नविना विश्वकर्मा र राजाबासकी १९ वर्षीया मनिषा राईलाई पाँच जनाको समूहमा रहेका किशोरीले निर्घात कुटपिट गरेका थिए । कुटपिट गरी त्यसको भिडियो सामाजिक सञ्जालमा अपलोड गरिएको थियो । घटना गएको शुक्रबारको हो ।
प्रेमीको कुरा काटेको र त्यसकै आक्रोशमा मदिरा सेवन गरी कुटपिट गरिएको प्रारम्भिक अनुसन्धानका क्रममा खुलेको प्रहरीले जनाएको छ । घटनापछि फरार अरू चार युवतीको खोजी भइरहेको डीएसपी राईले बताए । घटनामा संलग्न दुवै समूहका युवती साथीहरू हुन् ।
