आइतवार, कार्तिक १६ गते २०८३
- ट्रेण्डिङ :
- # समाज
- # मनाेरञ्जन
पहिरो पन्छाएसँगै हेटौँडा काठमाडौँ जोड्ने छोटो दुरीको भिमफेदी कुलेखानी सिस्नेरी सडक सञ्चालनमा आएको छ ।
आइतबारदेखि बन्द रहेको उक्त सडक पहिरो पन्छाएर सोमबार बिहान १० बजेबाट सञ्चालनमा ल्याइएको जिल्ला प्रहरी कार्यालय मकवानपुरले जनाएको छ । शनिबारदेखि परेको अविरल वर्षाका कारण खसेको पहिरोले भीमफेदी कुलेखानी सिस्नेरी काठमाडौँ सडक अवरुद्ध हुँदा यातायात सेवा बन्द भएको थियो ।
वर्षाका कारण इन्द्रसरोवर गाउँपालिका–२ मा सडकको माथिल्लो भागबाट खसेको पहिरोका कारण सो सडक खण्ड बन्द भएको जिल्ला प्रहरी कार्यालय मकवानपुरका प्रवक्ता एवम् प्रहरी नायव उपरीक्षक टेकबहादुर कार्कीले जानकारी दिए । उक्त पहिरो सोमबार बिहान पन्छाएर सडक सञ्चालनमा ल्याइएको उनले बताए ।
पहिरो ठुलो नभए पनि वर्षा भइरहेकाले आइतबार दिनभर पहिरो पन्छाउन समस्या भएको थियो । सोमबार वर्षा रोकिएसँगै सडक डिभिजन कार्यालय हेटौँडासँगको समन्वयमा जेसिभी प्रयोग गरी पहिरो पन्छाइएको थियो । सडक सञ्चालन भएसँगै हेटौँडा काठमाडौँ आवतजावत खुल्ला भएको छ ।
पहिरोका कारण रोकिएका सवारी साधनहरू गन्तव्य तर्फ प्रस्थान गरेको प्रवक्ता कार्कीले बताए । यता पहिरो खसेर बन्द भएको कान्ति लोकपथ भने सञ्चालन आउन सकेको छैन ।
कान्ति लोकपथ अन्तर्गतमा आइतबार बिहान बागमती गाउँपालिका–३ टाकुर्चेमा खसेको पहिरो साँझ नै पन्छाइएको थियो भने पाङ्दुर खोलामा पहिरो हटाउन सकिएको थिएन । सो स्थानमा अहिले पनि वर्षा रोकिएको र पहिरो पन्छाउने काम भइरहेको छ ।
