एजेन्सी । कोरोना भाइरसको विश्वब्यापी महामारी जारी रहेकै बेला विभिन्न मुलुकका वैज्ञानिकहरु यसविरुद्धको खोप विकासमा द्रुतगतिका साथ लागिरहेकै छन । यसै सन्दर्भमा अमेरिकी बायोटेक कम्पनी मोडेर्नाद्वारा विकास गरिएको कोरोनाविरुद्धको खोप ‘एमआरएनए १२७३’ को पहिलो चरणको नतिजा सार्वजनिक भएको छ । यो खोपले खासगरी बृद्धबृद्धाहरुको रोग प्रतिरोधी क्षमतालाई बढाएको कम्पनीले जनाएको छ ।
मोडेर्नाले अमेरिकाको नेशनल ईन्स्टिच्युट अफ एलर्जी (एनआइएआइडी)संग मिलेर विकास गरेको यो खोप सुरक्षित पनि भएको दावी गरिएको छ । ‘न्यु ईङ्ग्ल्याण्ड जर्नल अफ मेडिसिन’ मा प्रकाशित शोधपत्रका अनुसार पहिलो चरणको परीक्षणका क्रममा ५५ बर्षभन्दा माथीका मानिसहरुमा ‘एमआरएनए १२७३’ खोप निकै प्रभावकारी देखिएको छ । अर्थात बृद्ध उमेरका कोरोना संक्रमित विरामीहरुमा यो खोप अधिक प्रभावशाली रहेने पुष्टि हुन्छ ।
एनआइएआइडीका वैज्ञानिकहरुका अनुसार, कोरोना भाइरस संक्रमणको अधिक खतरा बृद्ध उमेरका मानिसहरुमा बढी छ । यस्तो अवस्थामा ‘एमआरएनए १२७३’ खोपको पहिलो चरणको सकारात्मक नतिजालाई निकै महत्वका साथ हेरिएको छ । परीक्षणमा ५६ देखि ७० बर्ष उमेर समूहका २० जना र ७१ वर्षभन्दा माथि उमेरका २० जनालाई सहभागी गराइएको थियो । यीमध्ये १० जनालाई कम र १० जनालाई खोपको अधिक डोज दिइएको थियो । यसरी खोप दिइएका सबैजनालाई एक महिनापछि पुनः दोस्रोपटक खोप दिइयो ।
यस क्रममा सबैलाई गहन रुपमा निरीक्षणमा राखिएको थियो । यीमध्ये धेरैजसोमा सकारात्मक परिणाम आएको छ । केहीमा हल्का ज्वरो आउने र थकानको महसुस हुने लक्षण पनि देखिएको थियो । यद्यपि अनुसन्धानकर्ताहरुले यो ‘एमआरएनए १२७३’ खोपलाई धेरै हदसम्म सुरक्षित भएको दावी गरेका छन ।
