शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
भियतनामबाट एक साथ १८० जना बुद्धिस्ट पर्यटक नेपाल भ्रमणमा आएका छन् ।
रुप्से होलिडेजका अनुसार उनीहरू चार्टर फ्लाइटमार्फत नेपाल भ्रमणमा आएका हुन् । यो सङ्ख्यामा भियतनामी बौद्ध धर्मालम्बी एकैपटक नेपाल आएको पहिलो पटक भएको कम्पनीले जनाएको छ ।
१८० तीर्थालु भियतनामको हनोइबाट हिमालय एयरलाइन्सको चार्टर फ्लाइट मार्फत सोझै काठमाडौं आएका हुन् । सो चार्टरमा रुस, युरोप, अमेरिका लगायत गन्तव्यबाट पनि पर्यटकहरू काठमाडौं आएका छन् ।
भियतनामी पर्यटकहरू ७ रात र ८ दिनको यात्रामा काठमाडौं ओर्लिएको कम्पनीले जनाएको छ । उनीहरूले काठमाडौं उपत्यकका विभिन्न बौद्ध गुम्बा र चैत्यहरूको भ्रमण गर्ने कार्यक्रम छ ।
साथमा हलेसी दर्शनमा समेत जाने छन् । पूर्णरूपमा धार्मिक पर्यटकको रूपमा आएका यी भियतनामी नागरिकले ध्यान र बौद्ध शिक्षाका लागि काठमाडौंमा रहेका विभिन्न चैत्य तथा गुम्बामा ६ दिन र हलेसीमा १ रात बिताउने कार्यक्रम छ । ह्वाइट गुम्बा, फर्पिङ्, स्वयम्भू, नमोबुद्ध र पाटनको भ्रमण अवलोकन गराउने तयारी छ ।
उनीहरू नेपालका पाँच तारे होटलहरूमा बसेको भन्दै कम्पनीले यो भ्रमणबाट नेपालमा लक्जरी यात्रा रुचाउने यात्रु भित्र्याउन सम्भव देखिएको समेत उल्लेख गरेको छ ।
