- ट्रेण्डिङ :
कुवेत – लुम्बिनी समाज नेपाल कुवेतको १३ औँ वार्षिकोत्सवको अवसरमा आयोजित ‘लुम्बिनी समाज नेपाल - अल मुल्ला एक्सचेन्ज भलिबल टुर्नामेन्ट २०२६’ को उपाधि आयोजक टोलीले नै जितेको छ। कुवेतको अबुहलिफास्थित टेक्निकल कलेजमा हालै सम्पन्न उक्त प्रतियोगितामा बागलुङ सेवा समाज कुवेतले दोस्रो र नेपाल मगर संघ शाखा कुवेतले तेस्रो स्थान हासिल गरेका छन्।
जुन १२ र १९ तारिख गरी दुई चरणमा सञ्चालन भएको उक्त प्रतियोगिताको उद्घाटन कुवेतका लागि नेपाली राजदूत घनश्याम लम्सालले गरेका थिए । समारोहमा गैरआवासीय नेपाली संघ (एनआरएनए) का केन्द्रीय सचिव सुजन केसी, एनआरएनए एनसीसी कुवेतका अध्यक्षद्वय विकास सिंह र दिलबहादुर पाख्रिन, तथा नेपाल पत्रकार महासंघ वैदेशिक शाखा कुवेतका अध्यक्ष राज मल्ल लगायत विभिन्न नेपाली संघ-संस्था तथा नेपाली राजनीति दलका वैदेशिक भातृ सस्थाका प्रमुख/ प्रतिनिधिहरूको बाक्लो उपस्थिति रहेको थियो।
खेलकुदको माध्यमबाट प्रवासी नेपालीहरूबीच भ्रातृत्व र एकता बढाउने उद्देश्यले आयोजित उक्त प्रतियोगितामा कुवेतमा क्रियाशील विभिन्न नेपाली समाज र संस्थाहरूका ११ टोलीले प्रतिस्पर्धा गरेका थिए । अनुशासित र भव्य रूपमा सम्पन्न खेलमा उत्कृष्ट प्रदर्शन गर्दै आयोजक टोलीले प्रथम स्थान सहित मुख्य ट्रफी हात पार्न सफल भयो ।
उक्त प्रतियोगिताले प्रवासमा रहेका नेपालीहरूलाई खेलकुदमार्फत एकताबद्ध बनाउनुका साथै स्वस्थ मनोरञ्जन र सामाजिक सद्भाव कायम गर्न महत्त्वपूर्ण भूमिका खेलेको छ । विजयी टोलीहरूलाई कार्यक्रमका अतिथिहरूद्वारा ट्रफी, मेडल र प्रमाणपत्र प्रदान गरिएको थियो ।
