- ट्रेण्डिङ :
बेनी - म्याग्दी जिल्लामा निरन्तर भइरहेको भारी वर्षाका कारण भएको पहिरोमा परी दुई महिलासहित चार जनाको ज्यान गएको छ भने पाँच जना अझै बेपत्ता रहेका छन्। घटनास्थलमा पुगेर खोजी तथा उद्धार कार्य भने निरन्तर रूपमा जारी रहेको छ।
सहायक प्रमुख जिल्ला अधिकारी कुलप्रसाद आचार्यका अनुसार पहिरोमा परी मृत्यु हुनेमा अन्नपूर्ण गाउँपालिका–३ फगामकी सिउकुमारी गर्बुजा र दोमाया पाइजा, अन्नपूर्ण गाउँपालिका–८ काफलडाँडाका १९ वर्षीय सविन गर्बुजा तथा मालिका गाउँपालिका–३ रुमडाँडाका किरण पुन रहनुभएको छ।
मृतकमध्ये दुई जना महिला र दुई जना पुरुष रहेको जनाइएको छ। घटनामा परी बेपत्ता हुनेहरूमा बेनी नगरपालिका–३ भकिम्ली छेपारेकी कुमारी विक, अन्नपूर्ण गाउँपालिका–८ काफलडाँडाका मनोज गर्बुजा, अन्नपूर्ण गाउँपालिका–५ पाउद्वार गिवाङका पहिचान नखुलेका दुई जना र मालिका गाउँपालिका–३ डाँडागाउँका अर्का एक जना रहेको प्रशासनले जनाएको छ।
बेपत्ता हुनेमा एक पुरुष, एक महिला र पहिचान नखुलेका तीन जना समावेश छन्। पहिचान नखुलेका व्यक्तिहरूको बारेमा थप विवरण भने स्थानीय वासिन्दा र सम्बन्धित पक्षसँगको समन्वयमा संकलन गर्ने काम भइरहेको छ।
घटनाको सूचनापछि नेपाल प्रहरी, सशस्त्र प्रहरी बल तथा स्थानीय तहका प्रतिनिधि र स्थानीय बासिन्दाहरूको सहभागितामा खोजी तथा उद्धार कार्य सुरु गरिएको छ। तर निरन्तर वर्षा र भूभाग अस्थिर रहेका कारण उद्धार टोलीले कठिनाइ भोगिरहेको बताइएको छ।
पहिरो जाने क्रम भने रोकिएको छैन। बाढी तथा पहिरोको जोखिम कायमै रहेकाले उद्धार कार्यका साथै सुरक्षाकर्मीहरूको सुरक्षालाई पनि विशेष ध्यान दिइएको छ।
जिल्ला प्रशासन कार्यालय म्याग्दीले वर्षा भइरहेको अवस्थामा जोखिमपूर्ण क्षेत्रमा भइरहेका बासिन्दाहरूलाई सुरक्षित स्थानमा सार्न तथा स्थानीय तह र प्रशासनको सूचना नियमित रूपमा अनुसरण गर्न आह्वान गरेको छ। साथै खोजी उद्धारमा सहयोग गर्न स्थानीय बासिन्दाहरूसँग पनि समन्वय गरिएको छ।
