- ट्रेण्डिङ :
कुवेत - कुवेत मौसम पूर्वानुमान महाशाखाले शुक्रबारदेखि देशमा तापक्रम घट्ने र हल्का छिटफुट वर्षाका साथै आइतबार मेघगर्जनसहित पानी पर्ने सम्भावना रहेको जनाएको छ।
मौसम विभागका कार्यवाहक निर्देशक धिरार अल-अलिलेका अनुसार मौसम सम्बन्धी नक्सा र गणितीय मोडेलहरूले देशमा 'इन्डियन मन्सुन लो' अर्थात् भारतीय मनसुनी न्यून चापीय प्रणालीको प्रभाव रहने देखाएका छन्। यसका साथमा तातो र ओसिलो वायुको द्रव्यमान (एयर मास) कुवेत क्षेत्रमा भित्रिने अनुमान गरिएको छ।
अल-अलिलेले अधिकतम तापक्रममा तुलनात्मक गिरावट आउने र यो ४० देखि ४३ डिग्री सेल्सियसको बीचमा रहने पूर्वानुमान गरेका छन्। त्यसैगरी न्यूनतम तापक्रम अधिकांश क्षेत्रमा २४ देखि २७ डिग्रीको बीचमा रहनेछ।
हावाको दिशा परिवर्तनशीलदेखि दक्षिण-पूर्वी रहने र यसको गति हल्कादेखि मध्यम हुने उनले बताए। तर कहिलेकाहीँ हावा तीव्र भई समुद्री छालहरू छ फिटभन्दा माथि उठ्न सक्ने सम्भावना पनि रहेको उनको भनाइ छ।
मौसम सामान्यतया तातो र अपेक्षाकृत ओसिलो (ह्युमिड) रहनेछ। विशेष गरी दिउँसोको समयमा तटीय क्षेत्रहरूमा आर्द्रताको प्रभाव बढी देखिने अनुमान छ, भने राति तापक्रम न्यानोदेखि मध्यम स्तरमा रहनेछ।
त्यसैगरी शनिबार साँझदेखि कुहिरो लाग्न सक्ने र यो आइतबार बिहानसम्म कायम रहन सक्ने पूर्वानुमान गरिएको छ।
मौसममा आउने यस परिवर्तनका बीच समुद्री छाल उच्च हुन सक्ने र कुहिरोले दृश्यता घटाउन सक्ने भएकाले समुद्री गतिविधि र सडक यात्रामा सावधानी अपनाउन मौसम विभागले सर्वसाधारणलाई सजग रहन आग्रह गरेको छ।
