- ट्रेण्डिङ :
कैलालीको गोदावरीका १५ वर्षीय टेकबहादुर कोली र १६ वर्षीया सीता साउदको शव आज कञ्चनपुरमा फेला परेको छ । दुबैजना गएको असोज २८ गतेदेखि परिवारको सम्पर्कमा थिएनन् । कञ्चनपुरको कृष्णपुर नगरपालिका–४ मालुमेलास्थित जङ्गलमा आज बिहान दुई जनाको शव फेलापरेपछि शव टेकबहादुर र सीताको भएको पुष्टि भएको छ ।
इप्रका झलारीको टोली घटनास्थल पुगेर अनुसन्धान सुरु गरेको छ । शव नजिकै सल्फास नामक विषादीको बट्टा पनि फेला परेको छ । घटनास्थल पुगेका एक प्रहरी अधिकृतले प्रेम सम्बन्धका कारण दुबैजनाले आत्महत्या गरेको हुनसक्ने बताएका छन् । तर, विस्तृत अध्ययन नगरीकन केही भन्न नमिल्ने उनको भनाइ छ ।
कञ्चनपुरका प्रहरी प्रवक्ता डिएसपी अमरबहादुर थापाले घटनाको अनुसन्धान सुरु भएको बताएका छन् । दुबैजना एकैपटक वेपत्ता भएपछि घरपरिवारले प्रहरीमा खोजिका लागि आग्रह गर्दै निवेदन दिएका थिए । टेकबहादुरका आफन्तले केही समयदेखि दुबैजना संगै हिड्ने गरेको र प्रेम सम्बन्धमा भएको हुनसक्ने बताएका छन् ।
दुबैजनाको प्रेम सम्बन्धका बारेमा केटी र केटापक्षका केही आफन्तलाई जानकारी रहेको थियो । पारिवारीकरुपमा प्रेम सम्बन्धलाई अस्वीकार गरेका कारणले दुबैजनाले ज्यान गुमाएका हुनसक्ने गाउँलेले बताएका छन् । प्रहरीले घटनाकाबारेमा अनुसन्धान सुरु गरेकाले अहिल्यै कुनै कारण भन्न नसकिने जनाएको छ ।
