मंसिर २४, २०७७ बुधवार
•
०९:२६:१४ बजे
बागलुङ — गत वर्ष प्याराग्लाइडिङको सफल परीक्षण भएपछि जिल्लाका पाँच स्थानमा प्रारम्भिक पूर्वाधार निर्माणको काम थालिएको छ ।
बलेवाको मुसुराबारी, भकुन्डेको मुलाबारी, पञ्चकोट, गलकोटको राम्चेढुंगा र निलुवामा काम सुरु भएका हुन् । मुसुराबारीमा मंगलबार रनवेको पूर्वाधार निर्माण थालिएको छ ।
गण्डकी प्रदेशको पर्यटन मन्त्रालयले चालु आर्थिक वर्षका लागि २० लाख लगानी गरेर प्रारम्भिक पूर्वाधार थालेको हो । मन्त्रालयले २ करोड लागतमा गण्डकी प्रदेशका पाँच स्थानमा प्याराग्लाइड निर्माण गर्ने योजनाअनुसार काम सुरु भएको हो । प्रदेशबाट सूचीकृत भकुन्डेबाट मुसुराबारी नजिकमा पर्छ । यहाँबाट यसअघि नै सफल परीक्षण भएको छ । बागलुङ र पर्वतका प्रायः स्थलको दृश्यावलोकनसहित प्याराग्लाइडिङ गर्न सकिन्छ । नियमित उडान गर्न बागलुङ नगरपालिका–१०, ११, १२, १३ र १४ ले संयुक्त प्रयास गरेका थिए । भकुन्डेस्थित मुलाबारीबाट पनि उडान गर्न सकिने गरी परीक्षण भएको वडा नम्बर १० का अध्यक्ष प्रेमबहादुर थापाले बताए । पोखरामा अन्तर्राष्ट्रिय विमानस्थल बनिरहेकाले पर्यटन मन्त्रालयले प्रदेशका पाँच स्थानमा प्याराग्लाइड सेवा विस्तार गर्ने योजना बनाएको थियो ।
चालु आर्थिक वर्षमा २ करोड बजेटबाट पाँचै स्थानमा प्रारम्भिक पूर्वाधार बनाइने उद्योग, वन, पर्यटन तथा वातावरणमन्त्री विकास लम्सालले बताए ।
