- ट्रेण्डिङ :
पत्रकारलाई इन्टरनेट जडान गर्दा २० हजार रुपैयाँसम्म अनुदान उपलब्ध गराउन सक्ने गरी प्रेस काउन्सिल नेपालले नीतिगत व्यवस्था गरेको छ ।
पत्रकारिताको विकास र विस्तारमा सहयोग पुर्याउने उद्देश्यसहित मिडिया विकास कोषबाट यस्तो अनुदान उपलब्ध गराइने काउन्सिलले जनाएको हो ।
काउन्सिलका अनुसार यस्तो अनुदान अति दुर्गम क्षेत्र एवम् दलित, महिला, अल्पसङ्ख्यक समुदाय तथा अपाङ्गता भएर पत्रकारिता गरिरहेका, न्यून आय भएका पत्रकारलाई उपलब्ध गराइनेछ ।
अनुदान प्राप्त गर्न सञ्चारमाध्यम कम्तिमा तीन बर्षदेखि नियमित सञ्चालनमा रहेको हुनुपर्नेछ भने पत्रकारको हकमा कम्तिमा पाँच वर्ष पत्रकारिता गरेको हुनपर्नेछ ।
उपलब्ध गराइने अनुदान प्रत्येक प्रदेशमा एक वर्षमा बढीमा २, २ जना पत्रकारले मात्र प्राप्त गर्नेछन् ।
काउन्सिलले यस्तो अनुदान प्राप्त गर्न आज (शुक्रबार) देखि गणना हुने गरी एक महिनाभित्र उल्लेखित योग्यता पुग्ने र प्रमाणित हुने बिल समेतका कागजात र नेपाल पत्रकार महासंघको सिफारिससहित निवेदन दिन सक्ने जनाएको छ ।
