शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
पाेखरा, पोखरामा टाइगर कप राष्ट्रिय महिला तथा पुरुष भलिबल प्रतियोगिताबाट १९ लाख बचत भएको छ । टाइगर ग्रुपको आयोजनामा सम्पन्न भएको उक्त प्रतियोगितामा सवै खर्च कटाएर १९ लाख ३० हजार ४१ रुपैयाँ बचत भएको हो । पोखरा रंगशालामा टाइगर कप राष्ट्रिय महिला तथा पुरुष भलिबल प्रतियोगिता माघ २७ देखि फागुन १ गतेसम्म भएको थियो ।
टाइगर ग्रुपका अध्यक्ष नारायण शर्माले प्रतियोगितामा ५४ लाख, ४१ हजार ८ सय ३५ रुपैयाँ आम्दानी भएको जानकारी दिएका छन । उनका अनुसार त्यसमध्ये ३५ लाख ११ हजार ७ सय ९४ रुपैयाँ खर्च भएको र १९ लाख ३० हजार ४१ रुपैयाँ बचत भएको छ ।
प्रतियोगितामा गण्डकी प्रदेश सरकारले १ लाख ५० हजार, राष्ट्रिय खेलकुद परिषद्ले १ लाख, पोखरा महानगरपालिकाले १ लाख, अन्नपुर्ण गाउँपालिकाले १ लाख सहयोग गरेको थियो । प्रतियोगितामा टिकट बिक्रीबाट १० लाख ५५ हजार रुपैयाँ आम्दानी भएको छ । क्लबले टिकट बिक्रीका लागि दोश्रो पक्षलाई जिम्मा दिएको थियो ।
भलिबल प्रतियोगितामा टिकट बिक्रीबाट यति धेरै रकम संकलन भएको पहिलो हो । प्रतियोगिताको फाइनलमा मात्रै ७ लाख ८० हजारको टिकट विक्री भएको अध्यक्ष शर्माले बताए । प्रतियोगिताबाट बचत रकम सामाजिक र भलिबल क्षेत्रमा खर्च गरिने उनले बताए । ग्रुपले प्रतियोगिताबाट बचत भएको रकम मध्ये बागलुङ बडिगाड गाउँपालिकाका एक अशक्त परिवारलाई ५० हजार रुपैयाँ सहयोग गरेको छ ।
