- ट्रेण्डिङ :
पोखरा - गण्डकी प्रदेश खेलकूद परिषदको सदस्य सचिवमा तेजबहादुर गुरुङ नियुक्त भएका छन् । आइतबार बसेको गण्डकी प्रदेश सरकारको मन्त्री परिषदको बैठकले गुरुङलाई सदस्य सचिवमा नियुक्त गरेको हो ।
नेपाल ह्याण्डबल संघका अध्यक्ष तथा नेपाल ओलम्पिक कमिटीका उपाध्यक्ष समेत रहेका गुरुङ पोखरा महानगरपालिका वडा नं १६ अर्मला कोटमा जन्मिएका हुन । ०४० सालमा आयोजना गरिएको दोस्रो बृहत राष्ट्रिय खेलकुदमा गुरुङले गण्डकीलाई ह्याण्डबल खेलमा स्वर्ण पदक दिलाउन सफल भएका थिए । उनले अंग्रेजी र राजनीति शास्त्रमा स्नातक उत्तीर्ण गरेका छन् ।
गुरुङ भारतको पटियालामा सम्पन्न एनआइएस प्रशिक्षणमा गोल्ड मेड लिष्ट पहिलो नेपाली समेत हुन् । उनले सन् १९८५ देखि १९८८ सम्म नेपाल ह्याण्डबल टिमको कप्तानी समेत गरेका थिए । गुरुङको प्रशिक्षणमा हङकङमा आयोजित ह्याण्डबलमा नेपालले पदक समेत जित हारिल गर्न सफल भएको थियो । उनले सन १९८५ मा जोर्डनमा सम्पन्न एशियन च्याम्पियनसिपमा नेपाली टिमको कप्तानी गर्दै खेलेका थिए । हाल गुरुङ अग्रज खेलाडीको छाता संस्था भूतपूर्व खेलाडी मञ्च नेपालको अध्यक्ष समेत हुन् ।
नवनियुक्त सदस्य सचिव गुरुङले प्रदेशको खेलकुदको विकासका लागि कार्ययोजना बनाएर अघि बढ्ने बताए । उनले समग्र खेलकुद विकासका लागि प्रदेश सरकारलाई बुझाएको सात बुँदे कार्ययोजना अनुसार खेलकुद क्षेत्रको विकासका लागि अघि बढ्ने बताए ।
प्रदेश खेलकूद परिषदको सदस्य सचिवका लागि गुरुङसहित नवराज अधिकारीले आवेदन दिएका थिए । गण्डकी प्रदेश सरकारका प्रवक्ता एवम् भौतिक योजना निर्माण मन्त्री रामशरण बस्नेतले सदस्य सचिवका लागि परेका २ जनाको आवेदनमध्ये गुरुङलाई सदस्य सचिवमा नियुक्ति गरिएको बताए ।
