शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
काठमाडौँ - राजधानीमा जारी ललितपुर मेयर कप महिला २० ट्वान्टी प्रतियोगितामा प्रदेश १ लेपहिलो जित निकालेको छ।
कीर्तिपुरस्थित त्रिवि क्रिकेट मैदानमा सम्पन्न खेलमा कप्तान रुबिना क्षेत्रीको उत्कृष्ट ब्याटिङको मद्दतमा प्रदेश १ ले लुम्बिनी प्रदेशमाथि १० विकेट जित निकाल्दै जारी प्रतियोगितामा पहिलो जित हात पारेको हो। यसअघि भएको पहिलो खेलमा प्रदेश १ विभागीय टोली एपिएफसँग पराजित भएको थियो।
लुम्बिनी प्रदेशले दिएको १ सय ५ रनको लक्ष्य प्रदेश १ ले १३ ओभर २ बलमा बिना विकेटको क्षतिमा पूरा गर्दै शानदार जित निकाललेको हो। प्रदेश १ को जितमा कप्तान रुबिना क्षेत्रीले अर्धशतकीय इनिङ्स खेलिन्। रुबिना ६८ रनमा अविजित रहिन् भने उनलाई काजल श्रेष्ठले व्यक्तिगत २५ रनको योगदान गर्दै जित निश्चित बनाइन्। अर्धशतकीय इनिङ खेलेकी रुविनाले ४९ बलको सामना गर्दा १२ चौका र १ छक्का प्रहार गरेकी हुन्।
यसअघि टस जितेर पहिले ब्याटिङ गरेको लुम्बिनीले २० ओभरमा २ विकेट गुमाएर १ सय ४ रन बनाएको थियो। लुम्बिनीका लागि सरस्वती मगरले ५० रनको अर्धशतकीय इनिङ्स खेलिन्। नेरी थापाले अविजित २० रन जोडिन्। यस्तै नितु भण्डारी १८ रनमा आउट हुँदा वर्षा राना शून्यमा पवेलियन फर्किएकी थिइन्।
प्रदेश १ की शबनम राईले एक विकेट लिइन्। जितसँगै प्रदेश १ ले २ खेलमा २ अंक जोडेको छ। पराजित लुम्बिनीको यो लगातार दोस्रो हार हो। पहिलो खेलमा लुम्बिनी ललितपुर मेयर्स ११ सँग २७ रनले पराजित भएको थियो।
प्रतियोगितामा मंगलबार दुई खेल हुनेछन्। पहिलो खेल ललितपुर मेयर्स ११ र एपिएफ तथा दोस्रो खेल प्रदेश १ र सुदूरपश्चिम प्रदेशबीच प्रतिस्पर्धा हुनेछ।
