- ट्रेण्डिङ :
कञ्चनपुर-महेन्द्रनगरस्थित महाकाली अस्पतालमा तीनजना कोरोना संक्रमितको मृत्यु भएको छ । अस्पतालका अनुसार बुधबार राति २ जना र बिहीबार बिहान १ जनाको मृत्यु भएको हो । भवानी भट्टले कान्तिपुरमा लेखेका छन।
कोरोना संक्रमित बिरामीको उपचारमा संलग्न डा। गोविन्द रोकायाका अनुसार बुधबार राति दोधारा चाँदनी नगरपालिका १ का ३० वर्षीय पुरुष र भीमदत्त नगरपालिका १९ का २१ वर्षीय पुरुषको मृत्यु भएको हो । यसैगरि भीमदत्त नगरपालिका १८ का ३६ वर्षीय महिलाको बिहीबार बिहान मृत्यु भएको हो ।
दोधाराका ३० वर्षीय पुरुष केही दिनअघि भारतबाट फर्केका हुन् । गड्डाचौकीमा एण्टिजीन परीक्षणमा पोजेटिभ आएपछि उनी होम आईसोलेसनमा बसेका थिए । बुधबार श्वाससमस्या देखिएपछि महाकाली अस्पतालको आईसीयुमा भर्ना भएका थिए ।
अर्का पुरुष रक्तक्यान्सरका बिरामी हुन् । बुधबार रगत चढाउन आएका उनलाई संक्रमण देखिएपछि आईसीयुमा राखेर उपचार भइरहेको थियो ।
बिहीबार बिहान मृत्यु भएकी महिला वैशाख ११ मा अस्पताल भर्ना भएकी थिइन् । उनलाई पनि बुधबारदेखि श्वास प्रश्वासमा समस्या देखिएको हो । अहिले महाकाली अस्पतालमा ६० जना संक्रमितको उपचार भइरहेको छ । जसमध्ये ३ जना गम्भीर रहेको डा। रोकायाले बताए ।
