- ट्रेण्डिङ :
पोखरा - अभिनेता नाजिर हुसेनले राष्ट्रिय आविष्कार केन्द्रलाई एक लाख रुपैयाँ सहयोग गरेका छन् । महावीर पुनले सञ्चालन गरेको राष्ट्रिय आविष्कार केन्द्रले कोरोना संक्रमितका लागि अक्सिजन सहयोग गरिरहेकाले नाजिरले उक्त संस्थालाई एक लाख रुपैयाँ हस्तान्तरण गरेका हुन् ।
हामी सवैले आफूहरुले सकेको सहयोग गर्ने हो । मैले मेरोतर्फबाट गरेको यो सानो सहयोगले कसैको जीवन बचाउन मद्दत मिल्छ भन्ने मैले अपेक्षा गरेको छु ,उनले भने, हामीले आफ्नै आँखाले हाम्रा दाजुभाइ तथा दिदीबहिनीहरुले ज्यान गुमाइरहेको देखेका छौं । हामी आफैं गएर अफ्ठ्यारोमा परेकाहरुलाई सहयोग गर्न सक्दैनौं, त्यसैले मैले मेरोतर्फबाट जसरी सक्थेँ र जति सक्थेँ त्यो सहयोग गरेको हुँ । हामी सबैले आफ्नोतर्फबाट सानो सहयोग गर्यौं भने पनि धेरैले गर्दा ठूलो सहयोग जुट्न सक्छ ।
आफूले गरेको सहयोगबाट एकजनाको मात्रै ज्यान बच्यो अथवा एउटा मात्रै अक्सिजन सिलिन्डर किन्न पुगे पनि आफूलाई त्यसले खुसी दिने उनी बताउँछन् । स्वास्थ्यकर्मी तथा अन्य व्यक्ति तथा संस्थाहरुले गरेको सहयोग उच्च प्रशंसनीय रहेको भन्दै उनले सकेको सहयोग गर्नुपर्नेमा जोड दिए ।
