एजेन्सी । अमेरिकामा कोरोना भाइरसविरुद्ध बनाइएको खोपको अहिलेसम्मकै ठूलो परीक्षण सुरु गरिएको छ । यो क्लिनिकल परीक्षणमा ३० हजार जना सहभागी भएका स्थानीय अधिकारीले बताएका छन् ।
परीक्षणमा सहभागी ३० हजार जनालाई दुई डोजका दरले खोप दिएपछि वैज्ञानिकले उनीहरुको अध्ययन गर्दै खोपले कुन समूहमा प्रभावकारी काम गर्यो भनेर पत्ता लगाउने छन्। अमेरिकाले बनाइरहेको खोपको यो अन्तिम चरणको परीक्षण हो । एक स्वयंसेवकलाई २८ दिनको अन्तरमा दुई मात्रा दिने तयारी गरिएको कम्पनीले जनाएको छ ।
यसअघिका परीक्षणमा खोप सुरक्षित देखिएको दावी कम्पनीले गरेको थियो । आउँदो नोभेम्बर महिनासम्ममा यसको नतिजा आएमा सन् २०२१ को सुरुवातमा यो खोप विश्व बजारमा उपलब्ध हुनेछ ।
तेस्रो चरणको क्लिनिकल परीक्षणमा जाने तीन देशका कम्पनीमा अमेरिका एक हो । यसअघि चीनका दुई र बेलायतको एक कम्पनीले उत्पादन गरेका खोप तेस्रो चरणको क्लिनिकल परीक्षणमा पुगेका छन् ।
