एजेन्सी । इजिप्टमा पाँच जना महिलाहरुलाई दुई वर्षका लागि जेल हालिएको छ । उनीहरुलाई १४ लाखभन्दा बढी जरिवाना पनि लगाइएको छ । ती महिलाहरुलाई समाजको माहोल बिगारेको आरोप लगाइ जेल हालिएको हो ।
इजिप्टमा सोमबार ती पाँच महिलाहरुलाई टिकटक चलाएकोमा दुई वर्ष सजाय सुनाइएको छ । उनीहरु माथि समाजको माहोल बिगारेको आरोप लगाइएको छ । त्यसैगरी तीन लाख इजिप्सियन पाउण्ड जरिवाना पनि गरिएको छ ।
ती महिलाहरु मध्ये हनीम होसाम र मोवादा अल–अधम पनि सम्लग्न छन् । सामाजिक सञ्जालमा यिनीहरुका लाखौं फलोअर छन् । होसामले टिकटकमा तीन मिनेटको भिडियो हालेर १३ लाख फलोअर बनाएकी छन् । उनले ती फलोअरलाई महिलाहरु मसँग काम गरेर पैसा कमाउन सक्छन् भनेकी छन् ।
त्यसैगरी अर्की महिला अधमले टिकटक र इन्स्टाग्राममा कतिपय भिडियोहरु अपलोड गरेकी थिइन् । यो भिडियो सार्वजनिक भएपछि अप्रिलमा होसामलाई र मईमा अधमलाई सरकारले गिरफ्तार गरेको थियो ।
यी महिलाहरुको गिरफ्तारी पश्चात देशमा रुढीवादीका प्रति सामाजिक विभाजनलाई लिएर बहस शुरु भएको छ । यस बिषयमा मानवअधिकारको क्षेत्रमा काम गर्ने वकिल तारेक अल अवदीले यसप्रकारको गिरफ्तारी आधुनिक सूचना र प्रविधिको युगमा पनि रुढीवादीहरु समाजलाई कसरी आफ्नो काबूमा राख्दछन् भन्ने प्रष्ट भएको बताए । ‘प्रविधिको क्रान्ति भइरहेको छ, सरकाले यसलाई स्वीकार्नु पर्दछ, ’ उनले भने ।
इजिप्टमा इन्टरनेट प्रयोगकर्ताहरुका लागि धेरै नै कडा नियम छ । अधिकारीहरु राष्ट्रिय सुरक्षाको खतरा बताउँदै कुनै पनि वेभसाइट बन्द गर्न सक्दछन् । यहाँ पाँच हजार भन्दा पनि बढी फलोअर भएका हरेक सोशल मिडियाका एकाउण्टमा निगरानी गर्ने गरिन्छ । इजिप्टका १० करोडभन्दा बढी जनसंख्यामा ४० प्रतिशतको पहुँचमा इन्टरनेट पुगी सकेको छ ।
