- ट्रेण्डिङ :
जापानको राजधानी टोकियोमा जारी ३२औं ग्रीष्मकालीन ओलम्पिक खेलकुद प्रतियोगितामा नेपालकी जुडो खेलाडी सोनिया भट्ट पहिलो खेलमै पराजित भएकी छन् । केहीबेरअघि सम्पन्न खेलमा भट्टले राउन्ड अफ ३२ अन्तर्गत महिला ४८ किलो तौल समूहमा रुसी खेलाडी इरिना डोल्गोभासँग हार व्यहोरेकी हुन् ।
जुडोको विश्व वरियतामा नेपालकी १९ वर्षीया भट्ट १२७औं स्थानकी खेलाडी हुन् भने रुसकी डोल्गोभा विश्व वरियताको नवौं स्थानमा रहेकी छन् । भट्टले डोल्गोभासित इप्पोनको आधारमा पराजय व्यहोर्नुपरेको हो । भट्टले सो खेलमा विपक्षी खेलाडसंग १ मिनेट १६ सेकेन्डसम्म मात्र भिड्न सकिन् ।
उनी वाइल्ड कार्डमार्फत टोकियो ओलम्पिकमा छनोट भएकी हुन् । भट्टले २०७६ मंसिरमा नेपालमै भएको १३औं दक्षिण एशियाली खेलकुद (साग) मा महिला ४८ किलोमुनिको तौलमा कास्य पदक प्राप्त गरेकी थिइन् । त्यस्तै आजै भएको सुटिङ स्पर्धामा नेपालकी कल्पना परियारले राष्ट्रिय किर्तिमान बनाए पनि पराजय व्यहोर्नुपरेको थियो ।
टोकियो ओलम्पिकमा अब पौडीका गौरिका सिंह र एलेक्स शाह तथा एथलेटिक्सकी सरस्वती चौधरीले प्रतिस्पर्धा गर्न बाँकी छ । सिंहले महिला १०० मिटर फ्री स्टाइल, शाहले पुरुष १०० मिटर फ्री स्टाइल र चौधरीले महिला १०० मिटर दौडमा प्रतिस्पर्धा गर्ने छ । रासस
