- ट्रेण्डिङ :
पोखरा । सत्तारुढ दल नेपाली काँग्रेसले बाढी–पहिरो र डुबानमा परेर मृत्यु भएकाहरूको परिवारलाई २५ हजार रूपैयाँ दिने घोषणा गरेको छ । काँग्रेसको बाढी–पहिरो विपद् व्यवस्थापन केन्द्रीय समन्वय समितिले २५ हजारका दरले आर्थिक सहयोग दिने घोषणा गरेको हो ।
समितिका संयोजक तथा काँग्रेस केन्द्रीय सदस्य मोहनबहादुर बस्नेतद्वारा जारी विज्ञप्ति मृतकका परिवारलाई २५ हजार राहत उपलब्ध गराउने उल्लेख छ । बाढी–पहिरो पीडितको उद्दार तथा राहतमा जुट्न पनि संयोजक बस्नेतले आग्रह गरेका छन् ।
साथै उनले सरकार सम्बन्धित निकाय, गैर सरकारी संस्था, स्वदेश तथा विदेशमा रहेका सहयोगी मनलाई सहयोगका लागि अनुरोध पनि गरेका छन् ।
यस्तै काँग्रेस केन्द्रीय समिति सदस्य तथा समितिका सचिव किरण गिरीले काँग्रेस जनताको सुख–दुःख र संकटमा निरन्तर साथ हुने बताए ।
यसै गरी प्रधानमन्त्री शेरबहादुर देउवा सुदुरपश्चिमको बाढी पहिरो र डुबान प्रभावित क्षेत्रको अवलोकनमा निस्कनुभएको छ । विहीबार विहान ८ बजे उनी काठमाडौंबाट बाढी पहिरो र डुबान प्रभावित विभिन्न जिल्लामा अवलोकन गर्न निस्कनुभएको हो ।
प्रधानमन्त्रीको टोलीमा अर्थमन्त्री जनार्दन शर्मा, पर्यटनमन्त्री प्रेम आले, पूर्वमन्त्रीत्रय एनपी साउद, रमेश लेखक र वीरबहादुर बलायर पनि सहभागी हुनुहुन्छ । प्रधानमन्त्रीको टोली सवार हेलिकोप्टर प्रधानन्त्रीको सरकारी निवास बालुवाटारबाट सिधै सुर्खेत जाने प्रधानमन्त्रीको सचिवालयले जनाएको छ ।
सुर्खेत विमानस्थलमा कर्णाली प्रदेशमा भएको क्षतिका सन्दर्भ प्रधानमन्त्रीले बिफ्रिङ लिनुहुने छ । त्यसपछि प्रधानमन्त्रीको टोली सुर्खेतबाट डोटीको दिपायल हुँदै बझाङ जाने कार्यतालिका रहेको छ ।
बझाङबाट प्रधानमन्त्री देउवा आफ्नो गृह जिल्ला डडेलधुरा जानुहुनेछ । त्यहाँ पनि बिफ्रिङ र अवलोकन गरेपछि टोली कञ्चनपुर प्रस्थान गर्ने छ ।
कञ्चनपुरको अवलोकनपछि प्रधानमन्त्रीको टोली कैलाली जाने छ । कैलालीको अवलोकनपछि प्रधानमन्त्रीको टोली धनगढी बास बस्ने छ । देउवाको टोली शुक्रबार बर्दिया र बाँके हुँदै काठमाडौं फर्किने छ ।
