- ट्रेण्डिङ :
#भबिन्द्र कुवॅर
श्रीमान 'हाम्रो भविष्यको श्रीमान्'ज्यू,
अहिले तपाईले हामीलाई नसम्झनुहोला है !
हामी त तपाईँको भोलिका लागि जन्मेका हौँ !
अहिले त तपाईँ र हामी झन्डै उस्तै देखिन्छौँ
कोइली र कागझैँ देखिन्छौँ
हेलमेल गर्ने समाज उस्तैउस्तै छ हाम्रो
रङ, रगत र वर्ग झन्डै उस्तै छन् हाम्रा
झन्डै परस्परमा ईष्र्या नै होलाजस्तो
त्यसैले अहिले तपाईले हामीलाई नसम्झिदिनुहोला ।
अहिले तपाईले हामीलाई नसम्झिदिनुहोला
यसरी आजैदेखि नजिकै भइदिँदा
हाम्रो बानी बिग्रेला र हामीले आफूहरूलाई
भोलि पनि तपाईँको बराबरीको ठानिएला
तपाईँको आत्मसम्मानमा आघात पुग्ला
हामी त केवल तपाईँको भोलिका लागि जन्मेका हौँ
अहिले तपाईले हामीलाई नसम्झिदिनुहोला ।
हामी त केवल तपाईँको भोलिका लागि जन्मेका हौँ
भर्खरै हिमाल चढ्दै हुनुहुन्छ तपाईँ
भोलि तपाईँ शिखर पुग्नुहोला
हो त्यतिबेला भने हामीलाई जरुर नसम्झिदिनुहोला
अहिले चाहिँ होइन
हामी त केवल तपाईँको भोलिका लागि जन्मेका हौँ ।
तपाईँ हिमाल चढेपछि शिखरबाट
हामी र हामीजस्ता भुइँमान्छेलाई हेर्दा, सम्झिँदा
बल्ल हिमाल चढेजस्तो अनुभूति होला तपाईँलाईहामी त तपाईँको त्यस बेलाका लागि जन्मिएका हौँ ।
श्रीमान् श्रीमान् ज्यू,
भावनामा बहकिएर आफ्नो असली पहिचान नगुमाउनुहोला
कृपया अहिले तपाईले हामीलाई नसम्झिदिनुहोला
हामी त केवल तपाईँको भोलिका लागि जन्मिएका हौँ
हामी त तपाईँको त्यस बेलाका लागि जन्मिएका हौँ ।
