नेपाल कम्युनिष्ट पार्टी (नेकपा)भित्रको विवाद समाधानका लागि गठन भएको कार्यदलले आजदेखि आफ्नो काम सुरु गर्दैछ । दिउँसो १२:३० बजे महासचिव विष्णु पौडेलको निवास भैँसेपाटीमा कार्यदलको बैठक बस्ने कार्यदल सदस्य पम्फा भुषालले जानकारी दिइन् ।
नेकपा अध्यक्षद्वय केपी शर्मा ओली र पुष्पकमल दाहाल 'प्रचण्ड'बीचको संवाद सकरात्मक उन्मुख भएपछि महासचिव पौडेलको संयोजकत्वमा भीम रावल, सुरेन्द्र पाण्डे, पम्फा भुषाल, शंकर पोखरेल र जनार्दन शर्मा सदस्य रहेको कार्यदल गठन गरिएको थियो ।
कार्यदलले अध्यक्षद्वयबीच भएको महाधिवेशन केन्द्रित छलफलका आधारमा सहमतिको प्रतिवेदन तयार गर्नेछ । त्यसैअनुसार नेकपाको औपचारिक बैठकबाट प्रतिवेदनमा उल्लेख भएका सुझावका आधारमा सहमति खोजिने छ ।
एक सचिवालय सदस्यले नेकपामा तत्काल देखिएको विवाद समाधान भएको बताएका छन् । अब औपचारिकताका लागि मात्रै कार्यदल बनाइएको हो । चैतसम्म महाधिवेशन गर्ने, राजनीतिक लाइन जनताको जनबाद हुने, सहमतिमा नेतृत्व चयन गर्ने, महाधिवेशनबाट प्रचण्ड पार्टी अध्यक्ष हुने र ओली बाँकी समय पनि प्रधानमन्त्री बन्नेलगायतका सहमति अध्यक्षद्वयबीच भएको छ ।
