प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच टेलिफोन संवाद भएको छ । प्रधानमन्त्रीका प्रेस सल्लाहकार सूर्य थापाले ओली र मोदीबीच टेलिफोन संवाद भएको जानकारी दिए ।
सीमा विवादले शीतयुद्धको स्थितिमा पुगेको नेपाल भारत सम्बन्धमा ब्रेक लागेको छ । प्रधानमन्त्री ओलीले स्वतन्त्रता दिवसको शुभकामना दिएको र पारस्परिक हितका विषयमा छलफल गरेको बालुवाटार स्रोतले जनाएको छ ।
पछिल्लो समय भारतीय राजदूतमार्फत प्रधानमन्त्री ओलीले भारतसँग अनौपचारिक संवाद थालेका छन् । अनौपचारिक संवाद स्वरुप नेपाल र भारतबीच जारी सीमा विवाद समाधानका लागि दुई देशका परराष्ट्र मन्त्रालयस्तरीय वार्ता पनि हुने भएको छ ।
काठमाडौंमा छिट्टै हुने नेपाल-भारत परराष्ट्र मन्त्रालयस्तरीय वार्तामा नेपालका परराष्ट्र सचिव शंकरदास बैरागी र भारतको तर्फबाट नेपालका लागि भारतीय राजदूत विनय मोहन क्वात्रा सहभागी हुनेछन् ।
