शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
नेकपा (एकीकृत समाजवादी)का अध्यक्ष माधवकुमार नेपालले जनता र देशलाई भुलेर गलत बाटोमा लागेपछि नेकपा (एमाले)लाई त्याग्नुपरेको बताएका छन् । धनुषाको विदेश नगरपालिकास्थित तिनकौरियामा आयोजित सभामा अध्यक्ष नेपालले भने,“नेकपा एमाले विदेशी दलालीमा लाग्यो ।
त्यसैले पुरानो घर त्याग्नुपरेको हो ।” अध्यक्ष नेपालले अहिले सत्य र न्यायका लागि नयाँ पार्टी गठन गरी अगाडि बढेको बताउँदै भने,“न्याय र सत्यको जित अवश्य हुने छ । ”
नेपालले आफू ५२ वर्षदेखि कम्युनिस्ट आन्दोलनमा लागेको उल्लेख गर्दै भने,“ठुला ठुला काम गरेका छौँ । राजाको शासन उखेलेर फाल्यौँ ।” उनले हिन्दी शैलीमा भने,“जो हमसे टकराएगा चुर चुर हो जाएगा ।”
उनले आफू प्रजातन्त्र, लोकतन्त्र, जनताको अधिकार र सम्मान तथा सत्य मर्यादाको पक्षमा उभिएको बताए । अध्यक्ष नेपालले एकीकृत समाजवादीले जहिल्यै जनताको सुख दुःखमा साथ दिने प्रतिबद्धता जनाए ।
कृषि क्षेत्रमा क्रान्ति र रोजगारी सिर्जना गरी सबैको जीवन राम्रो बनाउन आफूहरु लागि परेको उनको भनाइ थियो । कलम सत्यको पक्षमा उभिन्छ भन्दै चुनाव चिन्ह कलम लिएर जनतामाझ आएको उनको भनाइ थियो ।
उनले अब पालिका, राष्ट्रियसभा, प्रदेश र प्रतिनिधिसभाको चुनाव हुने भन्दै चुनावमा जितेपछि जनताको काम गर्ने, सिंचाइ र मलखादको व्यवस्था गर्ने पनि बताए ।
नेपालले विरोधीले कान लिएर काग भाग्यो भनेपटि कागको पाछाडि दौडिन नहुने कार्यकर्तालाई सुझाव दिँदै हिम्मत र बुलन्दीको साथ अगाडि बढेपछि जित हुने बताए ।
