- ट्रेण्डिङ :
मयूरपाटी - प्रमुख प्रतिपक्षी नेपाली काँग्रेसले सत्तारुढ नेकपाका नेताहरुले चिनियाँ कम्युनिष्ट पार्टीका नेताबाट प्रशिक्षण लिएको आरोप लगाएको छ । मंगलबारको प्रतिनिधिसभा बैठकमा बोल्दै काँग्रेस सांसद मिनेन्द्र रिजालले नेकपा नेताले चिनियाँ नेताहरुबाट प्रशिक्षण लिएको भन्दै आपत्ति जनाए । उनले कहिले नेकपाको आन्तरिक झगडा मिलाउने र कहिले प्रशिक्षण दिने चीनको गतिविधि अपाच्य रहेको टिप्पणी गरे ।
‘उत्तर छिमेकीले को नेपालमा सत्तारुढ दललाई आन्तरिक प्रशिक्षण दिने, आन्तरिक झगडा र सत्ता सन्तुलन मिलाउने काममा लाग्नु अपाच्य छ’, रिजालले भने । उनले विगतमा जस्तै कहिले दक्षिण र कहिले उत्तर फर्किने कूटनीतिक कमजोरी हुन नहुनेमा जोड दिए । नेकपाको स्कुलिङ विभाग र चिनियाँ कम्युनिष्ट पार्टी (सीपीसी) को विदेश विभागको आयोजनामा केही दिनअघि भर्चुअल अन्तरक्रिया भएको थियो ।
अन्तरक्रियामा नेपालका तर्फबाट नेकपाका अध्यक्ष पुष्पकमल दाहाल प्रचण्ड र उपप्रधान तथा रक्षामन्त्री ईश्वर पोखरेललगायत सहभागी थिए ।
