शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
संसदमा देखिएको गतिरोध अन्त्यका लागि भन्दै प्रधानमन्त्री शेरबहादुर देउवाले आज बोलाएको सर्वदलीय बैठकको मुख्य एजेण्डा भने एमसीसी रहेको खुलेको छ ।
प्रमुख प्रतिपक्षी दल नेकपा एमालेले निरन्तर रुपमा संसदमा गतिरोध गर्दै आएको भन्दै समाधानका लागि प्रधानमन्त्री देउवाले आज दिउँसो ४ बजे सर्वदलीय बैठक बोलाएका छन् ।
बैठकमा भने एमालेले सरकारको औचित्य नै नभएको भन्दै सर्वदलीय बैठकमा अनुपस्थित नहुने बताइसकेका छन् । जसका कारण संसद अवरोध भइरहेको छ, उनै बैठकमा सहभागी नहुने भएपछि बैठकमा अन्य दलहरुबीच मात्र छलफल हुने स्पष्ट छ ।
सर्वदलीय बैठक संसदको गतिरोध हटाउन भनिएपनि यो बैठकको मुख्य उद्देश्य भने एमसीसीका विषयमा सहमति जुटाउन बोलाइएको थाहा भएको छ ।
एमसीसी पारित गर्ने कि के गर्ने भन्ने विषयमा विभिन्न दलका संसदीय दलको बैठकमा समेत छलफल भइरहेका छन् । नेकपा माओवादी केन्द्रले यसअघि नै संसदीय दलको बैठकमा एमसीसीलाई यथास्थितिमा पास गर्न नसकिने बताइसकेको छ ।
आज मात्र बसेको नेकपा एसको संसदीय दलको बैठकमा अध्यक्ष माधवकुमार नेपालले आजको सर्वदलीय बैठकमा मुख्य एजेण्डा एमसीसी रहेको भन्दै सुझाव मागेका थिए ।
अधिकांश सांसदहरुले एमसीसी अहिलेको स्थितिमा पास गर्न नहुने बताएका थिए । कतिपय सांसदहरुले भने यसको सम्पूर्ण अधिकार अध्यक्ष स्वयमलाई भएकालेले विवेक पुर्याउन सुझाएका थिए ।
सर्वदलीय बैठकबाट एमसीसी पारित गर्नका लागि प्रयास भइरहेको बुझिएको छ । सत्तारुढ दल जनमोर्चाले पनि एमसीसीका विषयमा सहमति दिन नसकिने बताइसकेको छ ।
