बुधवार, कार्तिक १९ गते २०८३
- ट्रेण्डिङ :
- # समाज
- # मनाेरञ्जन
प्रतिपक्षी दल नेकपा एमालेका अध्यक्ष केपी शर्मा ओलीले पार्टीले कारबाही गरेका १४ सांसदहरुलाई सभामुखले कारबाही नगरेसम्म संसद अवरोध जारी राख्ने बताएका छन् ।
शनिबार विराटनगर विमानस्थलमा पत्रकारहरुले संसद अवरोध कहिलेसम्म भनेर राखेको प्रश्नमा अध्यक्ष ओलीले ‘आगामी चुनावसम्म’ भनेर जवाफ दिएका छन् ।
सञ्चारकर्मीको प्रश्न थियो– संसद अवरोध कहिलेसम्म ? अध्यक्ष ओलीको जवाफ थियो– चुनावसम्म । त्यसपछि पत्रकारहरुले थप प्रश्न गरे– चुनाव अगाडिसम्म संसद चल्दैन त ?
अध्यक्ष ओलीले प्रश्नको जवाफमा बलजफ्ती संसद चलाइएकोले संसद अवरोध भइरहेको सुनाए । उनले भने, ‘चलिरहेको छ त, हामीले विरोध गरिरहेका छौं, संसद चलिरहेको छ ।
बलजफ्ती गर्ने बानी परेकाले बलजफ्ती गरिरहेका छन् ।’ गत भदौमा एमालेले १४ सांसदलाई पार्टीबाटै निष्कासन गरेर कारबाही पत्र सभामुख अग्निप्रसाद सापकोटालाई जानकारी दिएको थियो ।
सभामुख सापकोटाले त्यसलाई मान्यता नदिएको भन्दै एमालेले निरन्तर कारबाहीको मागसहित संसद अवरुद्ध गर्दै आएको छ ।
एमालेले २३ भदौदेखि हालसम्मको संसद् बैठकसम्म लगातार संसद अवरोध गर्दै आएको छ ।
