शनिवार, कार्तिक १५ गते २०८३
- ट्रेण्डिङ :
- # समाज
- # मनाेरञ्जन
महाधिवेशनमा परिणत हुने भनिएको नेकपा (माओवादी केन्द्र) को राष्ट्रिय सम्मेलन आजबाट सुरु हुँदैछ । आउँदो मंगलबारसम्म चल्ने महाधिवेशन काठमाडौंको कमलादीस्थित प्रज्ञा प्रतिष्ठानमा आजदेखि सुरु हुन लागेको हो ।
नयाँ नेतृत्व चयन गर्ने सम्मेलनका लागि देशभरका प्रतिनिधि राजधानी काठमाडौं आइसकेका छन् । आठौं महाधिवेशनमा परिवर्तन गरिएको प्रथम राष्ट्रिय सम्मेलनको कमलादीस्थित प्रज्ञा भवनमा आज दिउँसो १ बजे उद्घाटन हुनेछ ।
सम्मेलनमा १६ सयभन्दा बढी प्रतिनिधि सहभागी हुनेछन् । जसमा १४८ जना अध्यक्ष पुष्पकमल दाहालले मनोनित गरेका छन् ।
यसअघि शनिवार अबेरसम्म बसेको स्थायी समितिको बैठकले राष्ट्रिय सम्मेलनलाई महाधिवेशनमा परिणत गर्ने निर्णय पनि पारित गरेको छ ।
आज बिहान ८ बजे केन्द्रीय कार्यालय पेरिसडाँडामा बस्ने केन्द्रीय समितिको बैठकले भने यसबारे आधिकारिक निर्णय गर्ने बताइएको छ ।
बिचारको बहस गर्ने भनेर डाकिएको राष्ट्रिय सम्मेलनले अब महाधिवेशनमार्फत नेतृत्वको बारेमा पनि छलफल गर्ने बाटो खुल्ला हुने संकेत गरेको छ ।
२१औं शताब्दीको समाजवादको नेपाली बाटो कस्तो हुने भन्ने बिषयमा छलफलका लागि सम्मेलनको आयोजना गरेको राजधानीका विभिन्न मिडियाका पत्रकारसँग बताएका पार्टीका अध्यक्षले एक्कासी महाधिवेशनको प्रस्ताव गरेका हुन् ।
अब गर्ने भनिएको महाधिवेशन आठौँ महाधिवेशन हुने बताइएको छ । स्थायी कमिटी बैठकपछि पेरिसडाँडामा प्रवक्ता कृष्णबहादुर पनि महराले राष्ट्रिय सम्मेलनलाई महाधिवेशनमा परिणत गर्ने निर्णय गरिएको बताए ।
